У межах падрыхтоўкі да сумесных стратэгічных вучэньняў узброеных сілаў Беларусі і Расеі «Захад-2017» адбудуцца сумесныя спэцыяльныя вучэньні з органамі вайсковага кіраваньня, злучэньнямі, вайсковымі часткамі і арганізацыямі тылавога і матэрыяльна-тэхнічнага забесьпячэньня ўзброеных сілаў дзьвюх краінаў.
Як паведамляе прэс-служба беларускага Міністэрства абароны, з 23 ліпеня для ўдзелу ў вучэньнях у Беларусь пачнуць прыбываць падразьдзелы матэрыяльна-тэхнічнага забесьпячэньня Заходняй вайсковай акругі Узброеных сілаў РФ.
Беларускім і расейскім вайскоўцам неабходна будзе сумесна падрыхтаваць пункты і сродкі кіраваньня злучэньнямі, вайсковымі часткамі і арганізацыямі тылавога, тэхнічнага забесьпячэньня ўзброеных сілаў, а таксама абсталяваць раёны практычных дзеяньняў войскаў.