Прэс-сакратар прэзыдэнта Расеі Дзьмітры Пяскоў у панядзелак пракамэнтаваў скандальнае інтэрвію кіраўніка Чачні Рамзана Кадырава амэрыканскаму кабэльнаму каналу HBO.
У ім Кадыраў у прыватнасьці прапанаваў «вывезьці з тэрыторыі рэспублікі геяў, калі яны там ёсьць», каб «ачысьціць кроў». Пры гэтым, адказваючы на пытаньне журналіста HBO пра цкаваньне геяў, ён падкрэсьліў, што ў Чачні няма людзей нетрадыцыйнай сэксуальнай арыентацыі.
«У нас такіх людзей няма, няма ў нас геяў. Калі ёсьць — забярыце ў Канаду, хвала Алаху, далей ад нас», — заявіў Кадыраў.
Акрамя гэтага Кадыраў таксама намаляваў карціну таго, што будзе, калі нехта нападзе на Расею:
«Амэрыка вядзе палітыку супраць Расеі, супраць кіраўніцтва дзяржавы. Яны ведаюць, што я адзін з тых, хто гатовы аддаць жыцьцё за Расею. І што ў мяне добрая армія, якая можа нападаць і абараняць. Паглядзім, што ў каго атрымаецца. У нас моцная дзяржава і ядзерная дзяржава. Калі нават нашу дзяржаву цалкам разбураць, аўтаматычна нашы ядзерныя ракеты паляцяць. І ўвесь сьвет мы перакулім, ракам паставім», — заявіў Кадыраў.
Пазьней ён пракамэнтаваў гэтае выказваньне ў сваім Telegram-канале: «Гэта ня проста словы, мы так і зробім. За нашу дзяржаву гатовыя жыцьцё аддаць». А міністар Чачні па нацыянальнай палітыцы, зьнешніх сувязях, друку і інфармацыі Джамбулат Умараў растлумачыў Эху Масквы, што словы Кадырава былі «цалкам шчырым экспромтам» і «імправізацыяй».
Пяскоў у сваю чаргу заявіў, што ня варта «вырываць» словы Кадырава з кантэксту:
«Што тычыцца інтэрвію Кадырава, то, шчыра кажучы, дастаткова часта з кантэксту проста вырываюць яго словы. Там сапраўды дастаткова былі жорсткія развагі, але іх трэба разглядаць толькі ў кантэксьце, і, калі іх разглядаць у кантэксьце, то нічога там надзвычайнага сказана не было», — растлумачыў прадстаўнік Крамля.