Кухары абяцаюць, што на «агульны» стол пададуць больш за сто беларускіх страваў.
Магілёўскія кавярні і рэстарацыі фармуюць мэню да «Тыдня беларускай кухні» з запатрабаванага ў наведнікаў. Стравы з бульбы і мяса найбольш папулярныя. Іх замаўляюць як беларусы, так і замежныя турысты. На вяршыні папулярнасьці трывала замацаваўся дранік.
Калдуны расейцам невядомыя
Шырокага анансаваньня акцыя магілёўскіх устаноў харчаваньня пакуль ня мае. На ўваходзе ў кавярні няма абвестак, толькі ў некаторых рэстаранах падрыхтаваныя асобныя мэню.
Беларускамоўнае мэню адной з магілёўскіх кавярняў
Ёсьць мэню па-беларуску. Наведнікам прапануюць сялянскія каўбасы, калдуны, скваркі, па-рознаму згатаваную пячонку ды дранікі.
«Дранікі, згатаваныя ў гаршчэчку і зь сьмятанай, калдуны зь мясам, скваркі са сьвініны, а таксама верашчака з сырнымі клёцкамі, грыбным соўсам і каўбаскамі. Гэтыя стравы ў нас найбольш папулярныя. Іх замаўляюць як нашы беларускія кліенты, так і расейскія турысты», — адзначыла супрацоўніца кавярні.
Паводле яе, беларуская кухня найбольш запатрабаваная ў замежных турыстаў.
Мэню да «Тыдня беларускай кухні»
«Амаль усе яны літаральна з парога просяць згатаваць ім чаго беларускага, — казала суразмоўца. — Некаторыя стравы, якія мы ім прапануем, для іх невядомыя. Напрыклад, нашы калдуны. Даводзіцца падоўгу тлумачыць, з чаго яны гатуюцца. Што да нашага драніка, то беларусы і іншаземцы ведаюць, што гэта такое, і часта гэтую страву просяць згатаваць у розных варыяцыях».
Беларусаў ведаюць па драніках
У мэню наступнай кавярні да «Тыдня беларускай кухні» значыцца тузін страваў. Наведнікі прапануюць падсілкавацца яечняй, закускай па-беларуску, бульбай па-вясковаму, дранікамі з смажанінай.
Гасьцей гораду закормліваюць дранікамі (архіўнае фота)
«Зразумела, што нашы дранікі ведаюць далёка за межамі Беларусі, і калі прыходзяць, скажам, расейцы, то абавязкова просяць іх згатаваць», — вылучалі бульбяную страву супрацоўнікі кавярні. У рэйтынгу найбольш папулярных страваў дранік быў першым.
«Дранікі са сьмятанай, з смажанінай, грыбамі ды цыбуляй, — рэкамэндавалі ў кавярні. — Яшчэ смажанка з бульбай, мясам, грыбамі і цыбуляй, залітай соўсам. Раім пакаштаваць згатаваную ў гаршчэчку бульбу зь мясам».
Кіраўнік гораду ўпадабаў мачанку
«Бульба застаецца асноўным прадуктам, зь якога беларусы гатуюць сабе ежу. Таму пазнаюць іх пераважна па бульбяных стравах», — адзначылі ў яшчэ адной кавярні.
Мэню да «Тыдня беларускай кухні» з улюблёнай стравай кіраўніка Магілёва — мачанкай
У кавярні не прамінулі паведаміць, што старшыня Магілёўскага гарвыканкаму Ўладзімер Цумараў дужа любіць мачанку з грыбамі. Гэтую страву суразмоўцы з кавярні вылучылі на першае месца. За мачанкай разьмясьцілі дранікі па-хатняму, бабку са сьвініны, грыбную поліўку ды капусту з грыбамі.
Бліны і халаднік таксама рэйтынгавыя
У наступнай кавярні драніку вярнулі першае месца. Яе адміністратарка, гаворачы аб прыярытэтах наведнікаў, засумнявалася, што беларусы дасьведчаныя ў сваёй кухні. На яе думку, іхныя веды павярховыя і навязаныя.
Уяўленьні беларуса пра сваю кухню (архіўнае фота)
«Таму дранік у нас у пашане, — адзначыла яна. — Расейцы, як да нас прыходзяць, дык, не пакаштаваўшы дранікаў, ня могуць пайсьці».
«Часта замаўляюць у нас дранікі, згатаваныя ў гаршчэчку, тоўстыя бліны, замешаныя на кефіры, з мачанкай, ды яшчэ халаднік беларускі», — сфармавала рэйтынг найбольш папулярных стравах у канцы гутаркі суразмоўца.
Не пакаштаваўшы драніка, расеец зь беларускай кавярні ня выйдзе
Бульбяныя стравы дамінавалі ў рэйтынгу папулярнасьці і ў кавярні, разьмешчанай непадалёк ад гасьцініцы «Магілёў».
«Дранікі ў гаршчэчку са сьвінінай, язычком; той жа халаднік ды калдуны», — казала адміністратарка кавярні».
Цяперашняя беларуская кухня трымаецца на бульбе
«Калі зыходзіць з запатрабаваньняў нашых кліентаў, то выходзіць, што беларуская кухня толькі на адной бульбе і трымаецца, — разважала суразмоўца. — Мяркую, што найбольш хадавыя стравы беларусы ўсё ж ведаюць, але як „капнуць“ глыбей, то, напэўна, зусім сумна будзе. Наведнікам з Расеі дык толькі падавай дранікі. Стэрэатып, што Беларусь „бульбяная краіна“, у іх моцна ўкараніўся. Калі прапануем што іншае, то задумваюцца».