У Менск на форуме Цэнтральнаэўрапейскай ініцыятывы знаходзіцца намесьнік міністра замежных спраў Польшчы Барташ Ціхоцкі.
Напярэдадні афіцыйных мерапрыемстваў ён сустрэўся зь беларускімі палітыкамі і грамадзкімі актывістамі.
Адна з удзельніц нефармальнай гутаркі, намесьніца старшыні Беларускай асацыяцыі журналістаў Аліна Суравец падзялілася са Свабодай уражаньнямі пра дыялёг:
«Ён спачатку нас выслухаў, кожны распавёў пра сытуацыю ў сваёй сфэры. Паралельна рабіў сабе паметкі па тэмах, якія мы ўздымалі. А потым адказаў на пытаньні, расказаў, што робіць Польшча. Галоўны пасыл, які прагучаў, такі. Палітыка ёсьць адкрытая, калі робяцца афіцыйныя заявы; а ёсьць скрытая, калі тэмы абмяркоўваюцца ў закрытым фармаце, не заўсёды выносяцца ў публічную сфэру. Таксама акцэнтаваў увагу: калі не гучыць у прэсе, што думае Польшча пра будаўніцтва БелАЭС ці пра сытуацыю вакол Белсату, гэта не азначае, што гэтыя пытаньні не хвалююць польскі бок. Ён некалькі разоў паўтарыў: Польшча — адзін зь беларускіх лябістаў на эўрапейскім узроўні. Таму ў такіх актуальных рэчах, як набліжэньне Беларусі да эўрапейскай супольнасьці, захады з польскага боку не спыняюцца».
Беларускія ўдзельнікі сустрэчы заклікалі польскі бок не спыняць падтрымку беларускіх грамадзкіх ініцыятываў і незалежных СМІ, а таксама адпаведным чынам рэагаваць на парушэньні правоў чалавека ў Беларусі. Пра гэта, у прыватнасьці, казаў старшыня праваабарончага цэнтру «Вясна» Алесь Бяляцкі.
На перакананьне актывістаў, салідарнасьць з дэмакратычнай супольнасьцю — доўгатэрміновы праект, які мае стаць адчувальным унёскам у разьвіцьцё дэмакратыі ў Беларусі.
Як мяркуе Аліна Суравец, польскія ўлады хочуць спрыяць дэмакратызацыі ў Беларусі:
«На сустрэчы былі прадстаўнікі амаль усіх партый, рухаў, якія дзейнічаюць у Беларусі. Барташ Ціхоцкі падзяліўся сваімі асабістымі назіраньнямі, наколькі эфэктыўна мы тут працуем. Таксама абмяркоўвалася пытаньне новых эўрапейскіх канцэпцый, якія наўпрост нібыта ня тычыцца Беларусі, але Польшча як краіна Эўразьвязу ў іх задзейнічаная. Таму занепакоенасьць наконт таго, што скончыліся нейкія польскія праграмы для Беларусі, пасьпешлівая. Ён пацьвердзіў: пэўная частка сродкаў сапраўды адцягнутая на ўцекачоў, якія прыбылі ў Эўропу з гарачых пунктаў, але пытаньне пра тое, што праграмы закрываюцца і больш іх ня будзе, не стаіць. Хвалявацца пра зьніжэньне цікавасьці да Беларусі ня трэба, польскія дыпляматы працуюць у самых розных кірунках. Проста трэба разумець, адзначыў Ціхоцкі, што няма магчымасьці выносіць у публічную сфэру абсалютна ўсё».
Падчас наведваньня Беларусі Барташ Ціхоцкі наведаў урочышча Курапаты, дзе ўсклаў кветкі да народнага мэмарыялу ахвярам сталінскіх рэпрэсій.
Намесьнік міністра замежных спраў Польшчы Барташ Ціхоцкі падчас ускладаньня кветак у Курапатаў