Расейскія войскі не застануцца ў Беларусі
«Нейкія заявы, якія ня маюць грунту пад сабой, — сказаў Макей. — Чытайце і слухайце прэзыдэнта Рэспублікі Беларусь, які сказаў, што сувэрэнітэт, незалежнасьць для нас — гэта сьвятое. На гэтым кропка».
Памежны кантроль для беларусаў у Расеі не трагедыя
«Калі нашы грамадзяне будуць праходзіць празь міжнародныя пункты пропуску гораду Масквы ды іншых аэрапортаў Расейскай Фэдэрацыі, то я таксама ня бачу тут трагедыі. Галоўнае, каб нашы грамадзяне мелі роўныя правы з расейскімі грамадзянамі. Таму што пра гэта існуюць дамоўленасьці ў рамках Саюзнай дзяржавы».
«На канфэрэнцыю запрошаныя ўсе міністры замежных спраў Беларусі за ўсю гісторыю».
Вяртаньне мяжы з Расеяй? Паглядзім
«Паглядзім, як далей будзе разьвівацца сытуацыя», — адказаў Макей на пытаньне пра магчымае вяртаньне мяжы паміж Беларусьсю і Расеяй.
Эўразьвязу далі ўсю інфармацыю пра «Белы легіён»
«Я не магу нічога сказаць наконт таго, як ідзе расьсьледаваньне ў справе „Белага легіёну“, гэта не кампэтэнцыя Міністэрства замежных спраў, — адказаў Уладзімер Макей на пытаньне Свабоды. — Але мы далі ўсю неабходную інфармацыю нашым эўрапейскім партнэрам наконт гэтага, якая існуе на сёньня. Будзем глядзець далей».
Пратэсты не душылі
«Я бы не сказаў, што было нейкае задушэньне, — сказаў Макей. — У любой сытуацыі важна мець дыялёг адзін з адным. Шчыры, адкрыты абмен думкамі. Асабліва наконт тых сур’ёзных праблемаў, якія могуць існаваць у стасунках паміж дзяржавамі. І ставіць сабе за мэту вырашыць гэтыя праблемы. Не замоўчваць, а вырашаць. Я ўпэўнены, калі мы будзем дзейнічаць у такім духу, заўжды зможам дасягнуць посьпеху».
Беларусь не спрабуе ўседзець на двух крэслах
«Нас ня раз падштурхоўвалі, каб мы зрабілі палітычны выбар: ты мусіш быць з Усходам альбо з Захадам, — сказаў міністар. — Хацеў бы зноў паўтарыць, беларускія інтарэсы не замыкаюцца на адным кірунку. А наша замежная палітыка — не вядомая спроба ўседзець на двух крэслах».
Адзіная постсавецкая краіна, дзе не было ўзброеных канфліктаў
«Мы здолелі не дапусьціць узьнікненьня хаосу, гвалту звонку, зьбераглі мір і бясьпеку, стабільнасьць у грамадзтве і дзяржаве, — сказаў Макей. — Беларусь — адзіная краіна на постсавецкай прасторы, дзе не было дапушчана ўзброеных канфліктаў. Такая сытуацыя захаваецца і ў будучыні».
Беларусь адзначае 25-годзьдзе ўсталяваньня дыпляматычных дачыненьняў з замежнымі краінамі. Экспэртная ініцыятыва «Менскі дыялёг» ладзіць міжнародную канфэрэнцыю «25 гадоў замежнай палітыкі Рэспублікі Беларусь». На яе запрошаныя міністры замежных спраў за ўсю гісторыю.