У апошнія гады зьявілася нямала паведамленьняў, што бег можа прыносіць менш карысьці, чым іншыя фізычныя нагрузкі, такія як хадзьба або плаваньне. Зьяўляюцца, аднак, і доказы адваротнага.
Апошнім дасьледаваньням у гэтай галіне прысьвечаны артыкул Луізы Дылнэр у брытанскай газэце The Guardian.
Згодна з аглядам часопісу Progress in Cardiovascular Disease (Прагрэс у сардэчна-судзінных захворваньнях), бегуны жывуць на тры гады даўжэй, чым тыя, хто ня бегае.
Вам нават ня трэба бегаць хутка або доўга, каб убачыць выгаду, піша Луіза Дылнэр. Вы можаце курыць, піць і мець залішнюю вагу і ўсё ж зьнізіце рызыку раньняй сьмерці на 25-40%, калі будзеце бегаць. Паводле аўтараў агляду, ніякія іншыя практыкаваньні ня маюць такога ўплыву на здароўе. Гадзіна бегу, статыстычна кажучы, павялічвае працягласьць жыцьця на сем гадзін.
Вядома, нават рэгулярнае беганьне ня зробіць вас несьмяротным, але, паводле вышэйзгаданага агляду, яно зьяўляецца больш эфэктыўным для падаўжэньня жыцьця, чым чым хадзьба, язда на ровары або плаваньне.
Двое аўтараў агляду таксама былі ўдзельнікамі дасьледаваньня, вынікі якога апублікаваныя ў 2014 годзе. Аказалася, што ад 5 да 10 хвілін бегу у дзень з хуткасьцю каля 10 кілямэтраў у гадзіну, зьніжаюць рызыку разьвіцьця сардэчна-судзінных захворваньняў і заўчаснай сьмерці ад усіх прычын. Гэта значна меншае намаганьне, чым агульнапрынятыя цяпер у сьвеце рэкамэндацыі мець кожны тыдзень 150 хвілін памяркоўных фізычных практыкаваньняў.
Бег трушком лічыцца памяркоўнай фізычнай нагрузкай. Калі адчуваеце недахоп часу, якраз бег можа вас уратаваць. Пры патрачаным меншым часе вы атрымаеце тыя ж перавагі, як і ад іншых відаў спартовай актыўнасьці, якія б, аднак, узялі ў вас удвая больш часу.
Адна з аўтараў агляду, доктарка з унівэрсытэту штату Аёва ў ЗША паведаміла, што ёй патрабуецца 105 хвілін ісьці пешкі, каб атрымаць такую самую нагрузку, як і за 25 хвілін беганьня.
Аўтары агляду сьцьвярджаюць, што няма ніякіх грунтоўных навуковых доказаў таго, што беганьне пагаршае становішча суставаў і храсткоў, асабліва ў каленях. Але ўсё ж магчымыя дрэнныя наступствы для каленных суставаў можна прадухіліць, калі вы будзеце бегаць па мяккіх паверхнях, калі будзеце рабіць дадатковыя практыкаваньні для цягліц ног, будзеце пазьбягаць пагоркаў і купіце добрыя красоўкі.
Вядома, ёсьць трагічныя рэдкія выпадкі сьмерцяў падчас беганьня, але тыя, хто ня бегае, маюць удвая большыя шанцы памерці ад раптоўнага сардэчнага прыступу ці інсульту.
Бегуны маюць ніжэйшыя ўзроўні тлушчу і больш вузкія таліі чым тыя, хто практыкуе іншыя віды актыўнасьці. Асабліва карысны бег для зьмяншэньня адкладаньняў тлушчу ў брушной паражніне.
Вам трэба бегаць толькі ад 30 да 60 хвілін у тыдзень, каб выкарыстаць перавагі, якія дае гэты від спартовай актыўнасьці.