Андрэй Стрыжак быў завочна пакараны 10 суткамі арышту гомельскім судом.
Пра гэта паведаміла ў Фэйсбуку Яўгенія Стрыжак:
«Андрэя затрымалі на мяжы. У гэтыя хвіліны яго здымаюць зь цягніка Вільня — Менск. Як і калі ён трапіць у ізалятар у Гомлі, я пакуль ня ведаю.
Upd: Затое цяпер я ведаю, што вышук аб’яўляюць ня толькі па крымінальных справах, але і па адміністратыўных. Што касуе сам сэнс адміністратыўнай вытворчасьці і ператварае яе ў крымінальны перасьлед».
Паводле другога допісу Юрыя Меляшкевіча, Андрэя Стрыжака затрымалі ў Маладэчне, куды ён даехаў на цягніку зь Вільні.
«Андрэй Стрыжак вярнуўся на Радзіму, але ўжо за 10 хвілін да прыпынку ў Маладэчне капітан-памежнік Рубан Аляксандар Мікалаевіч паведаміў, што Андрэй мусіць выйсьці. Магчыма, бліжэйшыя 10 сутак наш сябар правядзе ў Маладэчне...»
Андрэй Стрыжак — каардынатар моладзевай сеткі незалежнага прафсаюзу работнікаў радыёэлектроннай прамысловасьці (РЭП). Таксама Андрэй Стрыжак вядомы як валянтэр ініцыятывы «Гуманітарны маршрут «Беларусь — АТА».
Upd: Андрэй Стрыжак паведаміў, што ўжо знаходзіцца на волі.