Найбольш востра, на думку расейскага чыноўніка, гэта тычыцца патрабаваньняў да малака і малочнай прадукцыі.
Як заявіў Сяргей Данкверт у інтэрвію «Известиям», любыя прапановы Рассельгаснагляду ў ЭЭК, якія датычацца пытаньняў тэхнічнага рэгуляваньня, упіраюцца як мінімум у бязьдзейнасьць з боку адказных чыноўнікаў.
«Калі мы ўносім нейкія прапановы і просім ЭЭК хутка зрабіць захады, усе разумеюць, што гэта немагчыма. І зразумела, што гэтага дамагчыся нельга, калі ключавыя пасады, якія вызначаюць тэхнічнае рэгуляваньне, сельскую гаспадарку, займаюць нашы беларускія калегі», — сказаў ён.
У якасьці прыкладу неканструктыўнай працы Сяргей Данкверт прывёў тэхрэглямэнт на малако і малочную прадукцыю. Гэты дакумэнт забараняе выкарыстоўваць сухое малако ў вытворчасьці пітнога. Паводле чыноўніка, з дапамогай зацьверджанай тэхрэглямэнтам ЭЭК мэтодыкі выявіць наяўнасьць сухога малака ў пітным складана. Але праверкі Рассельгаснагляду найбуйнейшых беларускіх перапрацоўшчыкаў малака паказалі, што практычна ва ўсіх узорах сухое малако ёсьць, а ў некаторых доля яго складае каля 50%.
«Харчовая вайна» паміж Расеяй і Беларусьсю абвастрылася ў пачатку 2017 году. Падчас «Вялікай размовы з прэзыдэнтам» 3 лютага Лукашэнка выказаўся наконт прэтэнзіяў Масквы да беларускіх прадуктаў і нават паабяцаў распачаць крымінальную справу супраць кіраўніка Рассельнаснагляду Сяргея Данкверта за «нанясеньне шкоды дзяржаве».
З 4 па 6 лютага 2017 году «Рассельгаснагляд» у Бранскай і Смаленскай абласьцях забараніў увоз больш як 37 тон ялавічыны зь беларускіх мясакамбінатаў у Любані і Магілёве.
З 6 лютага Рассельгаснагляд увёў часовыя абмежаваньні на пастаўкі ялавічыны і ялавічных субпрадуктаў з усіх прадпрыемстваў Менскай вобласьці Беларусі, а таксама некаторых з Магілёўскай вобласьці. Сярод прычын называліся падазрэньні ў тым, што беларускія прадпрыемствы прадаюць у Расею мяса ўкраінскага паходжаньня.
8 лютага Рассельгаснагляд паведаміў, што ў студзені на мяжы спынены ўвоз зь Беларусі ў Расею больш як 40 партыяў малочнай і мясной прадукцыі беларускага паходжаньня.
9 лютага Рассельгаснагляд распаўсюдзіў заяву пра адкладаньне візыту сваіх спэцыялістаў у Беларусь, якія меліся праверыць месцы захоўваньня і вытворчасьці расьліннай прадукцыі. Прычына адкладаньня візыту — магчымыя «правакацыйныя дзеяньні зь беларускага боку».
14 лютага Рассельгаснагляд пашырыў сьпіс беларускіх прадпрыемстваў, якім абмежаваная пастаўка прадукцыі ў Расею.