Іншы адміністратар суполкі, студэнт аднаго зь менскіх ВНУ, уяжджаў 1 лютага ў Беларусь з Украіны праз пераход «Хаціслаў». Падчас асабістага дагляду мытнікі знайшлі друкаваную прадукцыю ў асабістых рэчаў і склалі пратакол. У акце адбору гаворыцца, што «зьмест некаторых налепак, як мяркуецца, мае экстрэмісцкі характар».
Сканфіскаваныя налепкі дзевяці відаў. Сярод іх выявы герба «Пагоня», Францішка Скарыны і бел-чырвонага белага сьцягу.
У тэксьце рашэньня гербы «Пагоня» і «Калюмны», а таксама лягатып суполкі фігуруюць як «невядомая сымболіка». Францішка Скарыну мытнікі назвалі «чалавекам зь невядомай сымболікай».
У рашэньні пра прызначэньне пералік налепак прадстаўлены наступным чынам:
1. Налепка «500 гадоў Беларускай Бібліі» з выявай чалавека (Францішак Скарына — РС) зь невядомай сымболікай.
2. Налепка «Ня сілай, а розумам» з выявай сонца, кнігі і невядомай сымболікі.
3. Налепка «Падатак з выявай чалавека і чатырох грузавых машынаў».
4. Налепка з выявай чалавека з галавой зубра і невядомай сымболікай.
«Мая краіна Беларусь» — адна з самых папулярных беларускіх суполак у сацыяльных сетках. На яе падпісана каля 150 тысяч чалавек.