27 студзеня Навабеліцкі раённы суд Гомелю мае пачаць разгляд адміністрацыйнай справы супраць былога міліцыянта, супрацоўніка дэпартамэнту аховы МУС Васіля Варушчанкі за публічную абразу беларускай мовы.
Варушчанка пакінуў камэнтар у пабліку парталу «Сильные новости» ў сацыяльнай сетцы «ЎКантакце» наступнага зьместу: «Беларуская мова — гэта труп, што гніе, які ўжо даўно трэба закапаць глыбей!».
Пратакол у дачыненьні былога міліцыянта складзены паводле артыкулу 9.22 КаАП у адміністрацыі Навабеліцкага раёну на патрабаваньне Гомельскага гарвыканкаму.
Паспрыяў справе сваім зваротам у гарвыканкам Ігар Случак, гомельскі грамадзкі актывіст, ініцыятар кампаніі «Справаводзтва па-беларуску».
«Усе грамадзяне павінны вучыцца паважліва ставіцца да беларускай мовы —мовы тытульнай нацыі», — лічыць спадар Случак.