Кіраўнік байк-клюбу «Начныя ваўкі» Аляксандар Залдастанаў па мянушцы «Хірург» зьвярнуўся да расейскага прэзыдэнта Ўладзіміра Пуціна з заклікам зьмяніць расейскі герб, паведамляе тэлеканал RT.
На думку «Хірурга», двухгаловага арла варта дапоўніць савецкімі сымбалямі — зоркай Перамогі і абрамленьнем з каласоў, што павінна замацаваць пераемнасьць паміж Расейскай Фэдэрацыяй і савецкай і імпэратарскай Расеяй.
"У першую чаргу мы павінны замацаваць пераемнасьць нашай дзяржавы. Цяперашні герб — двухгаловы арол — гэта пераемнасьць ад Расейскай імпэрыі. Але мы павінны таксама паказаць, што родам з СССР — з Гагарынскага кідка ў космас, першага спадарожніка, магутнай Савецкай арміі і, вядома, тытанічнай, сьвяшчэннай перамогі ў Вялікай Айчыннай вайне. І сымбаль гэтага гераічнага подзьвігу — зорка перамогі — знайшоў сваё адлюстраваньне на нашым гербе , — заявіў Залдастанаў.
Цяперашні герб зацьверджаны загадам прэзыдэнта Расіі Барыса Ельцына 30 лістапада 1993 году.
