Добры вечар! Беларускія прадпрыемствы «Гомельтранснафта Дружба» і «Полацктранснафта Дружба» накіравалі ў расейскую «Транснефть» паведамленьні пра падвышэньне цэнаў на транзыт расейскай нафты на 20,5% зь 1 студзеня 2017 году. Ясны знак, што цана на расейскую нафту на наступны год усё яшчэ не дамоўленая.
САЛАЎЁЎ НЕ БАІЦЦА ЛУКАШЭНКІ. Вядомы расейскі тэлепрапагандыст Уладзімір Салаўёў сказаў сёньня ў Менску, што «ў яго няма страху» перад Лукашэнкам, бо кіраўнік Беларусі – «ласкавы народны пэрсанаж», які «размаўляе сьмешна». Салаўёў прыехаў выступіць з творчым вечарам у вялікай канцэртнай залі Палацу Рэспублікі.
НАЙМАЛЬНІК ВЫРАШЫЎ ПАКІНУЦЬ. Лідзія Ярмошына застанецца на пасадзе старшыні Цэнтральнай выбарчай камісіі. Пра гэта яна паведаміла пасьля сустрэчы з Аляксандрам Лукашэнкам. Раней яна заяўляла, што можа пайсьці ў адстаўку, але рашэньне «залежаць ад плянаў наймальніка». Спадарыня Ярмошына паставіла своеасаблівы палітычны рэкорд на сваёй пасадзе, фармальна зацьвярджаючы чатыры выбары прэзыдэнта, пяць выбараў парлямэнту і два рэфэрэндумы, якія ні разу не прайшлі свабодна і дэмакратычна.
РАСЕЙСКІ ТОК-ШОЎ ЗАЕЎСЯ НА БЕЛАРУСАЎ. 24 лістапада на першым канале расейскага дзяржаўнага тэлебачаньня паказалі ў жывым эфіры ток-шоў «Время покажет», у якім абмяркоўвалі, ці ня пойдзе Беларусь «украінскім шляхам». У якасьці пачатку тэмы зачыталі ўрыўкі з новай кнігі старшыні Таварыства беларускай мовы Алега Трусава «Гісторыя сярэднявечнай Эўропы V-XV стст.». Трусаў кажа, што цытатаў, якія «прачыталі» падчас перадачы, у яго кнізе няма. Аўтарам перадачы ўдалося запрасіць беларускага гісторык Ніну Стужынскую. «Не магу апрытомнець, што называецца, Гэта быў проста жах» – сказала спадарыня Стужынская пасьля вяртаньня з Масквы ў Менск.
БЕЛАРУСЫ ТАКСАМА ПАВІННЫ ЎШАНАВАЦЬ ГЕТМАНА АСТРОСКАГА. У студзені ў Вільні, Варшаве і Кіеве адбудзецца прэзэнтацыя макету адноўленага надмагільнага помніка вялікаму гетману Літоўскаму Канстанціну Астроскаму. Пад яго кіраўніцтвам войскі ВКЛ здабылі 63 перамогі, у тым ліку — над Масковіяй у бітве пад Воршаю 8 верасьня 1514 году. Чаму да праекту не далучаныя беларуская дзяржава ды грамадзтва? Тлумачэньне тут.