25 лістапада Менск наведае Ўладзімер Салаўёў — расейскі журналіст і літаратар, аўтар шэрагу кніг, сярод якіх «Мы — русские! С нами Бог!», «Путин. Путеводитель для неравнодушных», «Путин — Медведев. Что дальше?», «Враги России», вядомы таксама сваімі прапагандысцкімі перадачамі на тэлеканале «Россия».
«Малады Фронт» напісаў на сваёй старонцы ў Фэйсбуку, што перад пачаткам выступу Салаўёва выйдзе на вулічную акцыю пратэсту.
«Гэта ня першы візыт расейскіх прапагандыстаў у Менск. Паказальна, што людзі, якія заяўляюць, што Беларусь — гэта не самастойная дзяржава, а частка Расеі ці „русского мира“, свабодна езьдзяць па Беларусі і ладзяць свае прапагандысцкія шоў у лепшых залях. У той час, як прадстаўнікам творчай беларускай эліты не даюць магчымасьці выступаць увогуле, адзін з ідэолягаў расейскага шавінізму ладзіць свой выступ у вялікай залі Палаца Рэспублікі», — лічаць у «Маладым фронце».
Кіраўнік арганізацыі Зьміцер Дашкевіч сказаў Свабодзе, што мэта такіх акцыяў — «зрабіць так, каб расейскія пісьменьнікі ведалі, што тут ёсьць супраціў».
Зьміцер Дашкевіч
«Маладафронтаўцы заклікаюць з 18 да 19 гадзінаў прыходзіць да будынку, дзе будзе адбывацца выступ прапагандыста Салаўёва. Мэта — распавесьці тым, хто прыйдзе на імпрэзу, пра тое, чым займаецца гэты чалавек, што гэта не такі „пухнаценькі“ пісьменьнік, як яго, да майго жаху, рэклямуюць на афішах. Мы зробім і раздрукуем падборку матэрыялаў зь яго выказваньнямі. Будзем раздаваць іх людзям. Але найбольш важна, каб ідэолягі вайны Расеі ва Ўкраіне, якія расказваюць, што Беларусь — гэта частка „русского мира“, не пачуваліся падчас сваіх прыездаў у Беларусь як акупанты на падкантрольнай тэрыторыі, як у сябе дома. Яны павінны разумець і бачыць, што ёсьць супраціў. Няхай сёньня гэты супраціў абмежаваны і нешматлюдны, але ён ёсьць і рана ці позна праявіцца ва ўсю моц».
Канцэртны дырэктар Ўладзімера Салаўёва Табрыз Шахідзі сказаў Свабодзе, што «канцэрт адбудзецца, ніякай рэакцыі з боку Салаўёва ня будзе».
Праграма, зь якой пісьменьнік выступіць у Менску, паводле яго канцэртнага дырэктара, «пра жыцьцё». На пытаньне, ці закранае яна палітычныя тэмы, Табрыз Шахідзі сказаў, што «сучаснае жыцьцё ня можа праходзіць без палітыкі».