У Маскве ў нядзелю прайшла другая канфэрэнцыя сэпаратыстаў з усяго сьвету. На мерапрыемстве прысутнічалі прадстаўнікі Тэхасу і Каліфорніі, Паўночнай Ірляндыі, гішпанскай аўтаноміі Каталёнія, Шатляндыі ды іншых рэгіёнаў.
Канфэрэнцыю арганізаваў «Антыглябалісцкі рух Расеі», які фінансуецца Крамлём. Сярод ганаровых сябраў руху — прэзыдэнт Сырыі Башар Асад і былы прэзыдэнт Ірану Махмуд Ахмадзінэжад. Паводле зьвестак РБК, на правядзеньне канфэрэнцыі быў выдзелены прэзыдэнцкі грант памерам 3,5 мільёна рублёў.
Першы зьезд сэпаратыстаў прайшоў у Маскве ў верасьні 2015 году. У ім прымалі ўдзел у тым ліку і прадстаўнікі самаабвешчаных Данецкай і Луганскай народных рэспублік. Паводле Крымінальнага кодэксу, заклікі да парушэньня тэрытарыяльнай цэласнасьці Расеі караюцца пазбаўленьнем волі на тэрмін да чатырох гадоў.