Усе жыхары цыганскай нацыянальнасьці пакінулі сяло Лашчынаўка ў Адэскай вобласьці, у якім мясцовыя жыхары разграмілі цыганскія дамы з-за падазрэньняў у забойстве дзіцяці.
Пра гэта паведамляе тэлеканал NewsOne са спасылкай на сьпікера Галоўнай управы Нацыянальнай паліцыі ў Адэскай вобласьці Насту Якубенку.
Яна ўдакладніла, што цыганы пайшлі, не забраўшы сваёй маёмасьці, хоць напярэдадні было вырашана накіраваць для гэтага адмысловы транспарт і забясьпечыць цыганам магчымасьць пакінуць пасёлак у бясьпецы.
27 жніўня ў закінутым доме ў Лашчынаўцы знайшлі цела васьмігадовай дзяўчынкі са сьлядамі гвалтоўнай сьмерці. Падазраваным аказаўся 20-гадовы малады чалавек цыганскай нацыянальнасьці. Пасьля гэтага мясцовыя жыхары разграмілі некалькі цыганскіх дамоў. Улады пагадзіліся зь іх патрабаваньнем выселіць цыганоў з Лашчынаўкі.