Кандыдатамі ў дэпутаты Палаты прадстаўнікоў Нацыянальнага сходу, паводле дадзеных ЦВК, вылучыліся 359 чалавек.
Больш за ўсё прэтэндэнтаў на месца ў Палаце прадстаўнікоў на дадзены момант у Менску — 80 чалавек. У выбаркамы паступіла 452 камплекты дакумэнтаў ад патэнцыйных кандыдатаў.
Вылучацца можна шляхам збору подпісаў, ад палітычных партый і ад працоўных калектываў, выкарыстоўваючы як адзін з гэтых спосабаў, так і два ці тры адначасова, нагадвае БЕЛТА.
Раней апазыцыйныя сілы Беларусі заяўлялі, што агульнымі намаганьнямі могуць заявіць для ўдзелу ў выбарах дэпутатаў Палаты прадстаўнікоў шостага скліканьня каля 250 прэтэндэнтаў.
Вылучэньне кандыдатаў у дэпутаты завяршаецца 1 жніўня, а іх рэгістрацыя — 11 жніўня. Па 10 верасьня ўключна пройдзе перадвыбарчая агітацыя. Выбары прызначаныя на 11 верасьня.