У фэйсбуку Tamara Kurdadze напісала, што заўважыла гэта, калі прывезла на «Яму» экскурсію.
«Якім трэба быць баязьлівым вырадкам і падонкам, каб зьдзекавацца над памяцьцю бязьвінных ахвяраў?! Гэтыя нікчэмнасьці зноў аблілі фарбай скульптуры.
Сёньня прывезла на экскурсію сталых людзей, у кожнага ў такіх вось ямах ляжаць дарагія людзі. І што мы ўбачылі? Мы жывем побач з вандаламі, з бязмозглымі ідыётамі, у якіх нічога сьвятога. Усе зьнерваваліся, сьлёзы, валякардын, спробы сьцерці фарбу. Але што можна зрабіць, калі адной рукой абапірацца на кій і спрабаваць не пасьлізнуцца па склізкай мокрай зямлі. Шматпакутны мой народ».
Раней на менскай «Яме» невядомыя некалькі разоў учынялі акты вандалізму, абліваючы помнік фарбаю.
Мэмарыял «Яма» на вуліцы Мельнікайтэ ў Менску прысьвечаны ахвярам галакосту. Тут 2 сакавіка 1942 года фашысты расстралялі каля 5 тысяч вязьняў менскага гета. Скульптурная кампазыцыя «Апошні шлях» прадстаўляе групу пакутнікаў, якія спускаюцца на дно ямы.
Аўтары бронзавай скульптурнай кампазыцыі — беларускі мастак, старшыня габрэйскіх абшчын Беларусі Леанід Левін і скульптар з Ізраілю Эльза Полак.