За ўдзел у пікеце, які адбыўся 28 красавіка, лідэра арганізацыі Свабоднага прафсаюзу Беларускага на прадпрыемстве «Полацак-Шкловалакно» Віктара Стукава аштрафавалі на 5,25 мільёна рублёў. Намесьніка старшыні рэспубліканскага СПБ Міколу Шараха за пікетаваньне, а таксама непадпарадкаваньне супрацоўнікам міліцыі пакаралі штрафам у 6,3 мільёна рублёў.
Чальцы СПБ выйшлі на пікет супраць парушэньня наймальнікам працоўнага заканадаўства, у выніку чаго з Шарахам не працягнулі працоўны кантракт. Міліцыянты выступалі на судовых працэсах абодвух актывістаў у якасьці сьведак.
У прысутных журналістаў і паплечнікаў прафсаюзных лідэраў склалася ўражаньне, што міліцыянты Сяргей Багумірскі і Ігар Скарабагаты ўвогуле не былі на акцыі, пра якую распавядалі. Прынамсі, пікетоўцы гэтых міліцыянтаў ня бачылі.
Пікет 28 красавіка, на якім міліцыянт убачыў два сьцягі замест аднаго
Паводле распараджэньня свайго кіраўніцтва, сказаў Скорабагаты, яны мусілі паляваць на журналістаў — «адсачыць, хто фатаграфуе або здымае пікет». А таксама «вызначыць найбольш актыўных удзельнікаў і аднаго зь іх затрымаць». Аднак са словаў Скорабагатага вынікала, што спадар Шарах нібыта трымаў у руках ня сьцяг СПБ, а «эўрапейскі, з зорачкамі». А міліцыянт Багумірскі ўвогуле бачыў у пікетоўцаў не адзін сьцяг, а два...
На пытаньне Міколы Шараха, чаму праваахоўнікі не падышлі і не папярэдзілі пра адміністрацыйную адказнасьць за несанкцыянаваны пікет, абодва адказалі, што на гэта не было загаду.
Падчас пікету 28 красавіка, за які судзілі актывістаў
Распараджэньне непасрэднага кіраўніка Ігара Емяльянава было іншае: затрымаць Міколу Шараха. Чаму менавіта яго — засталося незразумелым. Тое, што яго затрымлівалі не падчас акцыі, а ў пад’езьдзе ўласнага дому, гвалтоўна, міліцыянты патлумачылі «апэратыўнымі акалічнасьцямі». Падчас затрыманьня, цьвердзяць міліцыянты, спадар Шарах не падпарадкоўваўся іхным патрабаваньням. Хоць на той момант ён нават ня ведаў, што за ім у пад’езд забеглі супрацоўнікі сілавых структур — яны былі ў цывільным і не назваліся.
Ігар Емяльянаў, адказваючы на пытаньне спадара Шараха, пацьвердзіў, што абавязак міліцыі — прадухіляць правапарушэньні. Аднак ня змог патлумачыць, чаму гэта не было зроблена падчас пікету. Больш за тое: ён заявіў, што пра адміністрацыйную адказнасьць мусіла папярэдзіць пікетоўцаў Натальля Ганебная, супрацоўніца ідэалягічнага аддзелу.
Віктар Стукаў
«Яна сапраўды прыходзіла на пікет. І нават двойчы, як высьветлілася ў судзе. Першы раз — яшчэ да пачатку акцыі, бо мы пісалі ў звароце да райвыканкаму, што распачнём пікет у 10.00, але распачалі на паўтары гадзіны пазьней. Мы грунтаваліся на тым, што заканадаўства дазваляе ажыцьцяўляць прафсаюзную дзейнасьць у любых формах, і дзеля гэтага дазвол раённых уладаў не патрэбны. Таму, не атрымаўшы адказу з выканкаму, мы сьмела выйшлі на пікет да кінатэатру „Радзіма“. І толькі са сваёй судовай справы я даведаўся, што чыноўнікі, аказваецца, дасылалі нам адказ з забаронай акцыі. Толькі мы яго чамусьці не атрымалі», — распавёў Віктар Стукаў.
Паводле рашэньня судзьдзі Юліі Каласоўскай ён аштрафаваны за ўдзел у пікеце на 25 базавых велічынь — на 5 мільёнаў 250 тысяч рублёў.
Мікола Шарах
«Са словаў сьведкі, міліцыянта Ігара Емяльянава, відавочна вынікала, што „сыгнал“ міліцыя атрымала з райвыканкаму. І ўсе яны чакалі нашай акцыі. Ды яшчэ раздалі ўказаньні адсочваць журналістаў, якія прыйдуць на пікет! І адмыслова дачакаліся заканчэньня пікету — няйнакш каб мець падставы нас аштрафаваць. Пэўна, гэта ноў-хаў для папаўненьня бюджэту! На мне „зарабілі“, і яшчэ звыш мільёна нібыта за непадпарадкаваньне. Але навошта было ладзіць нейкі бандыцкі налёт, замест таго каб даслаць позву ў пастарунак?» — абураецца Мікола Шарах.
Паводле рашэньня судзьдзі Віталя Лапко, ён аштрафаваны за ўдзел у пікеце на 25 базавых велічынь — на 5 мільёнаў 250 тысяч рублёў, і яшчэ на 5 базавых велічынь — за непадпарадкаваньне супрацоўнікам міліцыі. Тым самым супрацоўнікам, якія так і не змаглі падлічыць сьцягі на пікеце, тым самым, якія сьведчылі, што паказвалі свае дакумэнты Міколу Шараху, а ён ад іх «уцякаў па лесьвіцы і называў бандытамі». І зусім ужо неверагодная была заява Сяргея Багумірскага, што спадару Шараху адразу ў пастарунку прапаноўвалі зьвярнуцца да адваката. Бо актывісту ў гэтай просьбе якраз-такі катэгарычна адмовілі, і ён нават напісаў скаргу ў пракуратуру.
Сябры і аднадумцы прыйшлі ў суд падтрымаць Шараха і Стукава
Спадары Шарах і Стукаў зьбіраюцца абскарджваць і рашэньні полацкіх судзьдзяў. Актывісты СПБ кажуць, што іх судзілі як прыватных асобаў і ня сталі аб’ядноўваць іхныя справы, каб не акцэнтаваць увагі на тым, што адбываецца дыскрымінацыя па прафсаюзнай прыкмеце. Кантракт з Шарахам не працягнулі, на іх погляд, з тых самых меркаваньняў: каб пазбавіцца ад актывістаў незалежнага прафсаюзу на прадпрыемстве і спыніць іхны ўплыў на іншых работнікаў.
Мікола Шарах (зьлева) і Віктар Стукаў у полацкім офісе СПБ