Гэта мог быць француз Ісмаіл Амар Мастэф. Таксама побач зь целамі сьмяротнікаў знойдзеныя сырыйскія пашпарты на імя Абдулакбака Б і Ахмэда Алмохамэда.
Імя тэрарыста, грамадзяніна Францыі Ісмаіла Амара Мастэфа апублікаваў у сваім фэйсбуку мэр гораду Шартр П’ер Жорж — паведамляе РБК. Жорж заяўляе, што Мостэф жыў у Шартры з 2012 году. Раней пракуратура Парыжу паведамляла, што з 2004 да 2010 гадоў Мастэф 8 разоў працягваўся да адказнасьці, аднак у турму не трапляў. Мяркуюць, што ў 2013-2014 гадах Мастэф знаходзіўся ў Сырыі.
Француская паліцыя затрымала брата і бацьку магчымага тэрарыста.
Пашпарт на імя грамадзяніна Сырыі Абдулакбака Б. знойдзены побач зь целам тэрарыста-сьмяротніка каля аднаго з уваходаў на стадыён Stad de France. Аднак пракуратура Парыжу яшчэ ня высьветліла, ці гэты пашпарт мае дачыненьне да тэрарыстычных атак. Вядома, што чалавек з такім імём нарадзіўся ў 1990 годзе.
Сэрбскае выданьне Blic назвала імя яшчэ аднаго меркаванага тэрарыста — грамадзяніна Сырыі Ахмэда Алмахамэда. Гэты чалавек мог трапіць у Парыж па балканскім маршруце ўцекачоў. 3 кастрычніка ён прыбыў на тэрыторыю Грэцыі, 7 кастрычніка — у Сэрбію з боку Македоніі, пасьля ў Харватыю і Аўстрыю.
Пашпарт знойдзены каля цела яшчэ аднаго тэрарыста-сьмяротніка. У паліцыі яшчэ няма зьвестак наконт таго, ці сапраўды пашпарт належыць тэрарысту.
Падчас 6 тэрарыстычных атак у Парыжы 13 лістапада 2015 году загінулі як найменей 129 чалавек. Адказнасьць узяла на сябе групоўка «Ісламская дзяржава».