Старшыня Цэнтральнай выбарчай камісіі Лідзія Ярмошына сёньня адказала на пытаньне Свабоды, ці маюць магчымасьць кандыдаты на прэзыдэнта, якія афіцыйна прайгралі Аляксандру Лукашэнку, аспрэчыць вынікі выбараў у Вярхоўным судзе Беларусі:
«Такіх магчымасьцяў у іх няма. Яны могуць цягам трох дзён зьвярнуцца ў Цэнтральную выбарчую камісію аб прызнаньні вынікаў выбараў несапраўднымі. І калі ЦВК адмовіць у такім прызнаньні, то наша рашэньне будзе канчатковым.
А вось калі ЦВК прызнае вынікі выбараў несапраўднымі па асобным участку альбо па ўсёй краіне, то гэтае рашэньне можна аспрэчыць у Вярхоўным судзе».
Спэцыяліст у галіне выбарчага права Сяргей Альфер так пракамэнтаваў выказваньні старшыні ЦВК:
Сяргей Альфер
«Ярмошына абсалютна мае рацыю. Тут, як кажуць, ні дадаць, ні адняць. Выбарчае заканадаўства Беларусі не прадугледжвае магчымасьці кандыдатаў аспрэчыць вынікі выбараў у судовым парадку. Гэта можна зрабіць толькі ў адміністратыўным парадку.
У нас можна аспрэчыць толькі тое, што прапісана ў законе. То бок у дачыненьні да выбарчага працэсу норма артыкула 60 Канстытуцыі Рэспублікі Беларусь пра тое, што кожны грамадзянін можа зьвярнуцца ў суд, ня дзейнічае. У выніку атрымліваецца цікавая сытуацыя. Калі выбары прызнаныя, то аспрэчыць іх праз суд нельга. А вось калі вынікі не прызнаныя самой Цэнтральнай камісіяй, то тады іх можна аспрэчыць празь Вярхоўны суд.
Што зробіш, калі такое заканадаўства? Ва ўсіх нашых суседзяў, я ўжо не кажу пра Польшчу, Літву, Латвію, а нават і ў Расеі, і ва Ўкраіне, такога, як у нас, няма. Бо там паўсюль дзейнічае канстытуцыйная норма — любы грамадзянін можа зьвярнуцца ў суд па любым пытаньні. Там няма абмежаваньня. Гэта толькі Рэспубліка Беларусь засталася такім дыназаўрам».