На плошчы Свабоды ў Менску адбыўся «Народны сход» супраць расейскіх вайсковых базаў у Беларусі.
Удзел у акцыі бралі каля 500 чалавек з антываеннымі плякатамі, зь бел-чырвона-белымі сьцягамі, у саколках-вышыванках і гербам «Пагоня».
На акцыі абвясьцілі аб утварэньні новага народнага руху «За дзяржаўнасьць і незалежнасьць Беларусі».
«Расейская вайсковая база ў Беларусі — небясьпека ня казачная»
Адзін зь ініцыятараў правядзеньня акцыі, былы кандыдат на прэзыдэнта і палітвязень, паэт Уладзімер Някляеў, прамаўляючы да прысутных, назваў плянаваную прысутнасьць расейскай вайсковай базы ў Беларусі каля Баранавічаў «небясьпекай ня казачнай»:
Някляеў: «У Крыме была расейская вайсковая база. І на расейскай вайсковай базе ўзьніклі тыя „зялёныя чалавечкі“, тыя салдаты, якія захапілі тэрыторыю незалежнай дзяржавы Украіна. Калі гэта было там, то чаму гэта ня можа быць тут?!»
«Лукашэнка — гэта вайна»
Былы кандыдат на прэзыдэнта і былы палітвязень Мікола Статкевіч, прамаўляючы да ўдзельнікаў гэтак патлумачыў прычыну і сутнасьць акцыі пратэсту:
Статкевіч: «Дыктатура штурхае нас да глябальнай вайны і робіць нас мішэньню дзеля нейкіх мэтаў. Каб на год ці два пасядзець у сваім крэсьле Лукашэнка робіць нас магчымай ахвярай нават ядзерных удараў. Лукашэнка — гэта вайна».
«Той хто пайшоў на выбарчы ўчастак — даў Лукашэнку карт-блянш на новыя вайсковыя базы»
Старшыня аб’яднанай грамадзянскай партыі Анатоль Лябедзька папярэдзіў прысутных пра іх магчымы саўдзел у разьмяшчэньні ў Беларусі расейскай вайсковай базы:
Лябедзька: «Калі Лукашэнка падпіша пагадненьне аб вайсковай базе, тады ведайце: той хто пайшоў на выбарчы ўчастак — ён дапамагаў Лукашэнку атрымаць легітымнасьць і даў яму карт-блянш, у тым ліку на новыя вайсковыя базы».
Your browser doesn’t support HTML5
Апазыцыя пратэстуе супраць расейскіх вайсковых базаў і стварае новы рух ВІДЭА
«Не патрэбны нам твае, расейскі прэзыдэнт, вайсковыя базы»
Прыдпрымальнік Аляксандр Таўстыка прамовіў на мітынгу ад імя сваіх дзяцей, якія прасілі перадаць Пуціну:
«Ня трэба нам твае базы. Пакінь іх у абарону сваіх людзей — на гэта ёсьць расейская канстытуцыя. Не патрэбны нам твае, расейскі прэзыдэнт, базы. Маім беларускім дзецям яны не патрэбныя. Скарыстайся сваёй канстытуцыяй і пакінь іх дома».
«Расейская стратэгія — вайна на чужой тэрыторыі»
Грамадзкі актывіст на Берасьцейшчыне Аляксандр Мех нагадаў, што кіраўніцтва Расеі не запытвае згоды на яе стварэньне ў Беларусі:
Мех: «Нагадаю гісторыю і ваенную стратэгію Расеі — гэта вайна на чужых тэрыторыях. Гэта вайна на беларускіх, украінскіх і іншых тэрыторыях. Гэта першая база, за гэтай ідуць іншыя. У нас ужо ёсьць інфармацыйная база — гэта расейскае тэлебачаньне. У нас ёсьць царкоўная база — расейская царква. Мы ўжо забыліся, што мы ёсьць беларусы, што мы ёсьць народ».
Ініцыятары сходу таксама абвясьцілі аб стварэньні аргкамітэту ўсебеларускага руху «За дзяржаўнасьць і незалежнасьць Беларусі». Яго старшынём абраны палітык і паэт Уладзімер Някляеў. Палітык Мікола Статкевіч на завяршэньне сходу заклікаў прысутных прыняць удзел у заключным сходзе на плошчы Свабоды 10 кастрычніка.