На заплянаванай на 28 верасьня сустрэчы прэзыдэнтаў Абамы і Пуціна ў кулюарах сэсіі Генэральнай асамблеі ААН амэрыканскі бок мае намер узьняць пытаньні, зьвязаныя з выкананьнем Расеяй Менскіх пагадненьняў па Ўкраіне і папрасіць растлумачыць намеры Масквы ў дачыненьні да Сырыі.
Як заявіў прэсавы сакратар Белага дому Джош Эрнэст, «Украіне адведзенае цэнтральнае месца ў парадку дня прэзыдэнта Абамы на яго сустрэчы з Пуціным».
«Эўрапейскія саюзьнікі ЗША просяць прэзыдэнта з усёй яснасьцю нагадаць Расеі аб яе абавязальніцтвах па рэалізацыі Менскіх дамоўленасьцей», — дадаў прэс-сакратар.
Гаворка, у прыватнасьці, ідзе пра пагрозу зрыву сэпаратыстамі на ўсходзе Ўкраіны мясцовых выбараў, прызначаных на канец кастрычніка. Абама таксама мае намер засьцерагчы Пуціна ад узмацненьня падтрымкі сырыйскага дыктатара Башара Асада.
Падчас брыфінгу прэс-сакратару Белага дому было зададзенае пытаньне: ці можна сказаць, што Масква з «вялікім адчаем» дамагалася сустрэчы двух прэзідэнтаў?
"Я думаю, так можна сказаць, улічваючы шматлікія просьбы, якія мы атрымлівалі ад расейцаў«,— адказаў ён.
У чацьвер з журналістамі сустрэлася прадстаўніца Белага дому Селеста Ўоландэр, якая курыруе ў Радзе нацыянальнай бясьпекі расейскі і цэнтральнаазіяцкі напрамкі.
«Сустрэча дасьць магчымасьць зразумець пляны Пуціна, зьвязаныя з вайсковай прысутнасьцю Расеі ў Сырыі. Маскве цяпер самы час растлумачыць, як яна збіраецца гуляць канструктыўную ролю ва ўрэгуляваньні сырыйскага канфлікту».
Паводле амэрыканскай прэсы, пасля інтэнсыўных абмеркаваньняў ў Белым доме прэзыдэнт Абама ўхваліў рашэньне размарозіць дыпляматычныя кантакты з Расеяй, хоць амэрыканскі бок не чакае прарыву ад нефармальнай сустрэчы прэзыдэнтаў «у кулюарах» сэсіі Генэральнай асамблеі ААН.
Абама і Пуцін ня гутарылі з часу тэлефоннай размовы, якая адбылася ў ліпені з нагоды ядзернага пагадненьня з Іранам.
«У сьвятле сытуацыі ва Ўкраіне і ў Сырыі і, нягледзячы на нашы глыбокія разыходжаньні з Масквой, прэзыдэнт Абама палічыў, што будзе безадказна не паспрабаваць дасягнуць прагрэсу сродкам наладжваньня дыялёгу з Расеяй на высокім узроўні», — заявіў у інтэрвію выданьню Politico прадстаўнік адміністрацыі Абамы.