Галоўны ваенны пракурор Украіны Анатоль Маціас паведаміў пра затрыманьне ў Кіеўскай вобласьці аднаго з самых небясьпечных байцоў расфармаванай роты МУС «Тарнада». Пра гэта Маціас напісаў на сваёй старонцы ў Фэйсбуку.

Анатоль Маціас
«У гатэльным комплексе на Абухаўскай трасе пад Кіевам, увечары 2015/09/09 адшукалі і затрымалі самага небясьпечнага і жорсткага з усіх падазраваных байцоў роты „Тарнада“ па мянушцы Маджахед — грамадзяніна Беларусі Лешука, які хаваўся ад сьледзтва і суда больш за 2 месяцы. Маджахед-Ляшук (ён жа, паводле пасьведчаньня супрацоўніка міліцыі, Аль-Такбір Даніял Аляксандравіч, мусульманін, вызнае каштоўнасьці экстрэмісцкай арганізацыі „Ісламская дзяржава“) падазраецца ў зьдзяйсьненьні цяжкіх і асабліва цяжкіх злачынстваў у складзе злачыннай арганізацыі зь ліку асобных супрацоўнікаў міліцыі роты патрульна-паставой службы „Тарнада“ пад кіраўніцтвам пяць разоў судзімага Руслана Анішчанкі», — гаворыцца ў паведамленьні Маціаса.
Паводле дадзеных ваеннага пракурора, затрыманы падазраецца ў зьдзяйсьненьні жорсткіх дзеяньняў супраць грамадзянскага насельніцтва, у прыватнасьці на тэрыторыі Луганскай вобласьці.
«Менавіта Маджахед — Ляшук з надзвычайным цынізмам і дзёрзкасьцю, жорсткасьцю і бязьлітаснасьцю зьдзяйсьняў найбольш жорсткія катаваньні мясцовага насельніцтва Луганскай вобласьці, арганізоўваў і прымаў непасрэдны ўдзел у згвалтаваньні затрыманых, якіх ён разам зь іншымі падазраванымі выкрадаў з карысьлівых меркаваньняў», — адзначыў Маціас.