Як паведамляе БЕЛТА, малодшы сын кіраўніка дзяржавы Мікалай Лукашэнка 18 жніўня разьвёз першую партыю прэзыдэнцкага ўраджаю ў менскія Дом-інтэрнат для пэнсіянэраў і інвалідаў і Дзіцячы гарадок Ленінскага раёну.
Раней Мікалай Лукашэнка толькі суправаджаў бацьку, цяпер жа ён робіцца самастойным героем паведамленьняў у СМІ, паўнавартасна выконваючы прадстаўнічыя функцыі і займаючыся дабрачыннасьцю. Радыё Свабода папрасіла палітолягаў прааналізаваць такую зьмену статусу трэцяга прэзыдэнцкага сына.
Прысутнасьць дзяцей у перадвыбарчай агітацыі — гэта неэтычны і недазволены ход, лічыць палітоляг і паліттэхноляг Уладзімер Мацкевіч:
Уладзімер Мацкевіч
«Сюжэт пра Колю, які раздае ўраджай абяздоленым, — гэта звычайны перадвыбарчы піяр-ход, адпрацаваны шмат дзесяцігодзьдзяў таму ў ЗША. Усе асобы, якія займаюць месцы ў эліце, павінны займацца дабрачыннасьцю ці яе імітацыяй. У Беларусі, напрыклад, дабрачыннасьць часьцей за ўсё прымае імітацыйныя формы.
Іншая справа, што 11-гадовы падлетак Коля ня можа самастойна прымаць рашэньні ці нешта ажыцьцяўляць. Таму тут мы бачым выкарыстаньне дзіцяці для дасягненьня дарослай мэты. Але нават у рэклямных тэхналёгіях лічыцца недапушчальным выкарыстаньне дзяцей, як і, напрыклад, аголенага цела і некаторых жывёлаў, калі такое выкарыстаньне надае рэкляме дадатковую моц».
Мікалай Лукашэнка ў менскім Доме-інтэрнаце для пэнсіянэраў і інвалідаў
Уладзімер Мацкевіч агулам скептычна выказаўся пра пабудаваную на сельскагаспадарчай дзейнасьці перадвыбарчую кампанію першай асобы краіны:
«Вырошчваць кавуны і бульбу на тэрыторыі прэзыдэнцкай рэзыдэнцыі — гэта дурны рэклямны ход, які, на жаль, вельмі добра супадае зь беларускай мэнтальнасьцю. Навошта прэзыдэнту вырошчваць бульбу? Няўжо не хапае палёў у Беларусі? Ды не, проста ёсьць у нас такая завядзёнка, што нават вельмі заможныя людзі павінны гарбаціцца на сваіх шасьці сотках. У выніку вырашчаная бульба становіцца ня ежаю, а нацыянальным сымбалем, кшталту вышыванкі. Вядома, кожны павінен займацца сваёй справай: прэзыдэнт мусіць разьбірацца ў праблемах краіны і лепш сачыць за эканамічнымі паказчыкамі, а не капаць бульбу. Нават калі чалавеку трэба адпачыць і пераключыцца на фізычную працу — для гэтага ёсьць фітнэс-клюбы і хакейныя арэны».
Раман Якаўлеўскі
Палітычны аглядальнік Раман Якаўлеўскі наадварот станоўча ацаніў асьветлены дзяржаўнымі СМІ ўчынак Мікалая Лукашэнкі, падкрэсьліўшы, што такім чынам сын прэзыдэнта дае станоўчы прыклад тым, хто ня дбае пра старых і інвалідаў:
«Гэта вельмі добры прыклад для аднагодкаў Колі. Трэба дапамагаць старэйшым, не забываць пра бацькоў. Я ў меншай ступені бачу тут функцыю афіцыйнага прадстаўніцтва сына прэзыдэнта, хаця палітычны складнік, безумоўна, тут ёсьць. Але ўвогуле не хацелася б казаць тут пра піяр. Вельмі добра, што дзіця прэзыдэнта не ў казіно сядзіць, а выконвае сацыяльную нагрузку. Тое, што Коля бяз бацькі паехаў у інтэрнаты, сьведчыць пра тое, што хлопчык расьце і ўжо можа нешта рабіць самастойна».
Мікалай Лукашэнка ў Дзіцячым гарадку Ленінскага раёну, раздае дзецям падарункі