Адзіную ў Беларусі ліцэнзію на выраб самагону атрымаў Слонімскі вінзавод. А беларусы — чарговы пасьля зьніклай прамысловай «Крамбамбулі» шанец займець нацыянальны напой.
Вытворцы «самагону», які насамрэч так называць забаронена, прэзэнтавалі свой напой у модным менскім бары «Хуліган». «ПершачОК ад дзеда. Традыцыйны» мае моц 42%, «ПершачОК ад дзеда. Люты» — 47%. Слова «самагон», як распавёў дырэктар заводу Міхаіл Акулік, выкарыстоўваць у краіне, дзе выраб самагону фактычна забаронены, ужываць некарэктна. Таму слонімскія «Першачкі» называюцца «напоямі сьпіртавымі са збожжавай сыравіны».
Раней вырабляць самагон дзяржава дазваляла толькі 4-м вытворцам, сярод якіх нацыянальны музэйны комплекс «Дудуткі» і нацпарк «Белавеская пушча». Слонімскія вытворцы распавялі, што падышлі да справы адказна. Рэцэпт шукалі «ў народзе», а самагонны апарат па адмысловай замове вырабіла менская фірма. Абсталяваньне зробленае зь медзі і можа вырабляць 35 літраў напою за дзень. Усяго ў запуск новага прадукту завод уклаў 5 млрд рублёў.
Дырэктар Слонімскага вінзаводу пераконвае, што напой мае мяккі смак, а пры разумным спажываньні галава на ранак балець ня будзе. Кажа, выпрабоўвалі на сабе.
Да таго ж, кіраўніцтва спадзяецца, што новы напой дазволіць ім даць рады эканамічным праблемам.
Прэзэнтацыя ў бары "Хуліган"
Прадстаўнікі Слонімскага вінзаводу
«Па гарэлцы сёньня сур’ёзная канкурэнцыя, — кажа Акулік. — Шмат гарэлкі нізкага цэнавога сэгмэнту, і гэта не ідзе на карысьць вытворцам». Акулік нагадвае, што тры найбуйншыя беларускія вытворцы гарэлак сёньня амаль стратныя.
«Мы таксама не адчуваем шчасьця з прыбыткам сёлета, — прызнаецца Акулік. — Але разьлічваем, што гэты прадукт дазволіць вырашыць нашыя праблемы».
Пакуль што завод мае права выпускаць 300 000 літраў самагону за год. Але кіраўніцтва заводу спадзяецца, што «першачкі» спадабаюцца і беларусам і замежнікам, і вытворчасьць будзе расьці. Калі ўсё пойдзе паводле пляну, зьявяцца і новыя віды «першачкоў».
Паўлітровая пляшка самагону слонімскага «Першачка» каштуе каля 76 тысяч рублёў, літровая — 130 тысяч.
Падчас прэзэнтацыі
Фірмовы кактэйль з самагону ад бармэнаў "Хулігана"