Чаму Расея адмаўляецца ад міжнароднага трыбуналу па зьбітым малайзійскім «Боінгу»? З такім пытаньнем наш карэспандэнт зьвяртаўся да гарадзенцаў.
Your browser doesn’t support HTML5
“Гэты самалёт – ахвяра, за якую Расея павінна адказваць”, – апытаньне ў Горадні
Мужчына сярэдняга веку: «Я думаю, наагул доўгі час пра гэта ніхто не даведаецца праўды. Ракету выпусьцілі, а хто гэта зрабіў — невядома, адны на адных паказваюць. Хоць павінны ведаць дакладна, бо такія спадарожнікі ўверсе лётаюць. Прыйдзе час, і ўсё высьветліцца, бо гэта сур’ёзная справа».
Мужчына сярэдняга веку: «Там недалёка ад граніцы з Расеяй, і таму яны там прысутнічалі адназначна і, хутчэй за ўсё, самі маюць дачыненьне да гэтага. Вось такая мая думка».
Малады мужчына: «Я на пытаньні пра палітыку не адказваю...»
Мужчына сярэдняга веку: «Таму што гэта несур’ёзна. Гэта элемэнтарнае пытаньне. Навошта з кожнай нагоды ствараць трыбуналы? Я згодзен з афіцыйнай пазыцыяй Расеі. Ну стварылі трыбунал па Югаславіі, і што? Я думаю, што гэта толькі дзеля таго, каб стварыць дадатковы ціск на Расею».
Мужчына пэнсійнага веку: «Ня маю паняцьця. Няхай яны самі вырашаюць, ім відней...»
Мужчына сярэдняга веку: «Найхутчэй, яны хочуць схаваць ад людзей праўду. Расея хоча зацьвердзіць сваю пазыцыю, што яна нібыта ратуе Ўкраіну ад фашызму. Але гэты самалёт — ахвяра, за якую яна павінна адказваць».
Малады мужчына: «Гэта іх палітыка, і я не хачу ўмешвацца. Факт той, што гэта хочуць зваліць на іх. Але ж там былі баявыя дзеяньні, і чыя была праўда, а хто вінаваты — ніхто не дакажа. Адны кажуць, што страляла расейская ўстаноўка, іншыя — што ўкраінская, а каму верыць?»
Мужчына сярэдняга веку: «На расейцаў кажуць, што яны дэградуюць. Але думаю, што гэтая вайна выгадная іх ураду, бо там грошы вялікія замешаныя. А ў іх грошы вырашаюць усё...»
Мужчына пэнсійнага веку: «Іх жа не павінны пакараць. Магчыма, яны проста не давяраюць трыбуналу».