24 сакавіка журналістка з Газы Надзія Абу Шабан апублікавала гэты здымак у твітэры з подпісам: «Фотажурналіст зрабіў здымак сырыйскага дзіцяці. Яна падумала, што гэта зброя, а ня камэра, і здалася!» Журналістка адразу ж паведаміла, што яна не зьяўляецца аўтаркай здымку. Адзін з карыстальнікаў апублікаваў арыгінальны фотаздымак, які зьявіўся ў турэцкай газэце «Turkyie».
photojournalist took this photo 4 Syrian child, thought he has a weapon not a camera so she Gave up ! #Surrended pic.twitter.com/bm1hOWQWJY
— Nadia AbuShaban (@NadiaAbuShaban) March 24, 2015
Подпіс пад здымкам быў перакладзены на ангельскую мову з памылкамі пра пол і ўзрост дзіцяці. Ніжэй публікуем тэкст без памылак пра маленькую сыыйскую ўцякачку:
«Раптам яна апускае галаву, кусаючы ніжнюю губу зубкамі і павольна падымае ручкі. І стаіць у гэтай пазыцыі, ня кажучы ні слова. Гэта няпроста — пацешыць дзіця, якое думала, што фотаапарат — гэта нацэлены на яе аўтамат, гатовы да стрэлу. Яе завуць Гудзія, ёй толькі чатыры гады. Яна страціла свайго тату ў бамбаваньні гораду Хама. Дзяўчынка прыбыла ў лягер для ўцекачоў Атмэ на турэцка-сырыйскай мяжы са сваёй вельмі неспакойнай мамай і трыма братамі і сёстрамі».
Журналісты зь Бі-Бі-Сі знайшлі фатографа, які зрабіў гэты здымак. Асман Сагырлы. Ён пацьвердзіў сваё аўтарства фатаграфіі. Здымак ужо камэнтавалі ў турэцкамоўных мэдыях, аднак сапраўдную папулярнасьць ён набыў, калі яго апублікавалі тыдзень таму з подпісам па-ангельску. Фатограф зрабіў гэты здымак у сьнежні 2014 году ў лягеры для сырыйскіх уцекачоў у Турцыі. Ён падкрэсьліў, на тварах дзяцей — больш чым дарослых — бачна ўсе жахі вайны.
З пачатку канфлікту ў 2011 годзе, паводле зьвестак Упраўленьня Вярхоўнага камісара Арганізацыі Аб’яднаных Нацый па справах уцекачоў, каля 8 мільёнаў чалавек вымушаныя былі пакінуць свае дамы. Больш за 12 мільёнаў чалавек патрабуюць дапамогі, каб выжыць, прыкладна 4,8 мільёнаў чалавек унутры краіны знаходзяцца ў цяжка даступных месцах.