Экспазыцыю выставы складаюць два дзесяткі работ вядомых аўтараў — Аляксея Марачкіна, Міколы Рыжага, Міколы Купавы ды іншых. Сярод экспанатаў — партрэты заснавальнікаў і дзеячаў БНР, выявы слынных ваяроў, паўстанцаў і асьветнікаў, пачынаючы ад часоў Вялікага княства літоўскага.
Як падкрэсьліў Мікола Купава, галоўны экспанат на выставе — мэмарыяльная дошка, прысьвечаная абвяшчэньню БНР 25 сакавіка 1918 году, якую выканаў скульптар Алесь Шатэрнік. Гэтая мэмарыяльная шыльда захоўваецца ў сядзібе Партыі БНФ, паколькі ўсе намаганьні грамадзкасьці яе ўсталяваць, засталіся марнымі.
Your browser doesn’t support HTML5
Купава: Мы рыхтуемся да 100-годзьдзя БНР
«Гэтая мэмарыяльная шыльда зойме належнае ёй месца, яна будзе вісець на тым гістарычным будынку, які захаваўся на вуліцы Валадарскага, 9. Яна будзе ўпрыгожваць горад і зьбіраць натоўпы людзей, якія захочуць адчуць і зьведаць падзею, якая адбылася 25 сакавіка 1918 году. А адкрыцьцё, я думаю, адбудзецца на 100-угодкі БНР», падкрэсьліў Мікола Купава.
Адкрываючы выставу мастак адзначыў:
«Гэтай выставай мы распачынаем падрыхтоўку да сьвяткаваньня 100-юбілею БНР, якое будзем адзначаць праз тры гады. Таму гэтым разам гэта камэрная выстава, а 100-годзьдзе адсьвяткуем шырокім колам удзельнікаў-мастакоў у Палацы мастацва на іншай, буйнейшай пляцоўцы».
Як паведаміў Мікола Купава, мастакі суполкі «Пагоня» таксама прынялі ўдзел у складаньні экспазыцыі яшчэ адной выставы, якая таксама разьмясьцілася ў сядзібе партыі БНФ. Яна атрымала назву «Гісторыя беларускай дзяржавы ў паштовых марках». Значная колькасьць экспанатаў гэтай выставы прысьвечаныя абвяшчэньню БНР 25 сакавіка 1918 года, а таксама новаму гучаньню гэтай гістарычнай падзеі на пераломе 80-90-гадоў мінулага стагодзьдзя. Сярод экспанатаў выставы — паштоўкі, канвэрты, маркі, прысьвечаныя БНР, маркі з выявамі герба «Пагоня» і бел-чырвона-белага сьцягу, а таксама сэрыі марак, прысьвечаныя выбітным асобам і падзеям розных пэрыядаў гісторыі Беларусі.