Судзьдзя Натальля Вайцэховіч прызнала яго вінаватым у парушэньні заканадаўства аб масавых мерапрыемствах.
Сьведкамі на судзе выступілі супрацоўнікі Цэнтральнага РУУС Менску Грызенка і Корзун, якія затрымлівалі актывіста, паведамляе spring96.org.
Аляксей Шубара затрыманы 12 сьнежня ў Менску ля Кастрычніцкай плошчы, дзе ён праводзіў адзіночны пікет. Актывіст быў зь бел-чырвона-белым сьцягам і плякатам «Людзі, трэба тэрмінова спыніць Пуціна. Не сусьветнай вайне». Такім чынам ён выказваў пратэст супраць палітыкі прэзыдэнта Расеі Ўладзімера Пуціна і распальваньня трэцяй сусьветнай вайны.
Выходныя да суду актывіст правёў у Цэнтральным РУУС Менску.
Кіраўнік грамадзкага аб’яднаньня «Альтэрнатыва» Алег Корбан паведаміў, што ў ізалятары Аляксей захварэў, бо там холадна зраніцы, а пасьцельную бялізну і покрыва яму не выдавалі.
Паводле Корбана, Аляксей Шубара выйшаў у цэнтар Менску, «каб выказаць сваё меркаваньне пра палітыку Крамля, расейска-ўкраінскі канфлікт».
«Аляксей Шубара — звычайны хлопец, жыве ў здымнай кватэры на вуліцы Ангарская. Працуе ў будаўнічай фірме, больш-менш зарабляе на жыцьцё, мае сям’ю (выхоўвае малалетняе дзіця). Паўтара гады таму далучыўся да шэрагаў „Альтэрнатывы“, некалькі разоў браў удзел у акцыях, але ўсё абыходзілася безь перасьледу ўладаў».