Беларус Міхаіл Жызьнеўскі, які загінуў 22 студзеня на вуліцы Грушэўскага ў цэнтры Кіева, будзе ўзнагароджаны ордэнам Героя Нябеснай сотні.
21 лістапада, у гадавіну пачатку Эўрамайдану, прэзыдэнт Украіны Пётар Парашэнка падпісаў указ аб прысваеньні загінулым ўдзельнікам пратэсту («Нябесная сотня») званьня Героя Украіны. Подпіс пад дакумэнтам Парашэнка паставіў падчас сустрэчы з сем’ямі забітых актывістаў.
Прэзыдэнт Украіны адзначыў, што згодна з заканадаўствам, гэтае званьне нельга прысвоіць тром загінулым замежнікам, таму яны будуць узнагароджаны ордэнамі Героя Нябеснай сотні, паведамляе прэс-служба ўкраінскага прэзыдэнта.
Жызьнеўскаму было 25 гадоў, ён жыхар Гомеля.