У кампаніях Пефціева і Тарнаўскага пакуль не камэнтуюць, ці паспрыяюць новыя ўмовы актывізацыі іх дзелавой актыўнасьці за межамі Беларусі — у офісах іх кампаній Свабодзе зазначылі, што апошнія рашэньні Эўразьвязу «вывучаюцца». Тым часам Свабода пацікавілася ў Юрыя Чыжа, ці ня крыўдна яму, што калегаў выкрасьлілі з чорнага сьпісу, а яго — не.
Разам з хакейнай камандай Аляксандра Лукашэнкі Юры Чыж цяпер знаходзіцца ў Аб’яднаных Арабскіх Эміратах.
Карэспандэнт: «Юры Аляксандравіч, зьнялі санкцыі пэрсанальна з Пефціева і Тарнаўскага, вас пакінулі. Чым патлумачыце?»
Чыж: «Нават ня ведаю, не цікавіўся пакуль што. Шчыра кажучы, я цяпер у адпачынку і ў прынцыпе ня ў курсе справы».
Карэспандэнт: «Некаторыя вашы кампаніі, як і Пефціева, гэтаксама апраўданыя. Але калі яго рэабілітавалі асабіста, то вас — не».
Чыж: «Значыць, яго вельмі моцна там любяць, адрозна ад мяне...»
Карэспандэнт: «Той жа Пефціеў дамагаўся сваёй рэабілітацыі праз Эўрапейскі суд, вы пакінулі справу на самацёк. Можа гэта паўплывала?»
Чыж: «Цяжка сказаць. Паколькі я ніякай падрабязнай інфармацыі ня маю, мне няма чаго абмяркоўваць. Магчыма, на наступным тыдні, як вярнуся, абмяркуем».