31 жніўня ў парафіі Найсьвяцейшай Тройцы ў Друі адзначалася 100-годзьдзе нараджэньня біскупа Часлава Сіповіча. Сьвятую імшу ачоліў Апостальскі Нунцый у Беларусі, арцыбіскуп Клаўдыё Гуджэроці. У прамове на беларускай мове, арцыбіскуп, сярод іншага сказаў:
«Спадзяемся, што біскуп Сіповіч даруе моўныя памылкі прадстаўніку Папы ў Беларусі, які намагаецца сёньня гаварыць пра яго на ягонай жа мове. Гэта выраз таго, што ўвесь Касьцёл паважае і шануе гэтую мову і гэты народ, і просіць прабачэньня за тое, калі не заўсёды рабіў гэта так, як павінен».
Гэтыя словы прабачэньня ўзрушылі беларускую грамаду. Упершыню так гучна, і не прыватная, ці нават дзяржаўная асоба, а такая аўтарытэтная ў сьвеце інстытуцыя, як каталіцкі Касьцёл, папрасіла прабачэньня ў беларускага народу і ягонай мовы.
Ці можна расцэньваць гэтыя словы як акт пакаяньня каталіцкай царквы перад беларускім народам?
Хто яшчэ і за што павінен быў бы пакаяцца перад беларускім народам, яго мовай, культурай?
Ці пачуюць беларусы калі-небудзь словы пакаяньня ад Расеі і расейскай праваслаўнай царквы?
Ці ёсьць беларусам у каго прасіць прабачэньня, ці нават каяцца?
Наколькі ўвогуле важнае ў сучасным сьвеце пакаяньне?
Пытаньні абмяркоўваюць пісьменьнікі і журналісты Беларускай службы Радыё Свабода — Сяргей Абламейка і Сяргей Дубавец. Вядзе перадачу Вячаслаў Ракіцкі.