З нагоды юбілею Радыё Свабода пры падтрымцы парталу Tuzin. fm, «Арт Сядзібы» і суполкі Мая Краіна Беларусь прапанавалі музыкам інтэрпрэтаваць адзін са знакавых сьпеваў беларускага року — «Радыё Свабода» гурту Ulis. Упершыню гэты твор на словы Фэлікса Аксёнцава і музыку Славы Кораня быў выдадзены на альбоме «Краіна доўгай белай хмары», вядомы таксама і ў выкананьні гурту N. R. M. Мы прэзэнтуем зробленыя беларускімі музыкамі кавэры.
Вы можаце зрабіць і свой кавэр. Дасылайце нам на пошту radiosvaboda@gmail. com.
Сваю вэрсію песьні «Радыё Свабода» прэзэнтуе 20-гадовая студэнтка 3-га курсу ЭГУ Ірміна Ластоўская.
«Радыё Свабода я слухаю ня вельмі даўно, пазнаёмілася са Свабодай нядаўна. Пра конкурс я даведалася праз інтэрнэт, у групе Арт-сядзібы ў сацыяльнай сетцы Ўкантакце, дзе паведамлялася пра конкурс. Гэтую песьню я раней ніколі ня слухала. Калі паслухала, яна мне вельмі спадабалася. Гэта сьветлая і лёгкая мэлёдыя. І мне яна вельмі спадабалася. Што тычыцца майго кавэру, то я вырашыла не замарочвацца, і стварыла лёгкі вясеньні варыянт — акустычная гітара і мой голас».
