7 верасьня ў касьцёле сьвятых Сымона і Алены ў Менску адбылася ўрачыстасьць, з нагоды пачатку навучальнага году ў Менскім тэалягічным каледжы. Навучаньне там будзе весьціся па-беларуску.
Гэта новая навучальная ўстанова ў каталіцкім касьцёле, якая будзе займацца падрыхтоўкай выкладчыкаў рэлігіі і іншых спэцыялістаў.
Першы дзень новага навучальнага году распачаўся ўрачыстай малітвай з удзелам сьветароў-выкладчыкаў і студэнтаў. Арцыбіскуп Тадэвуш Кандрусевіч, які ўзначаліў сьвяточную імшу, паведаміў карэспандэнту Свабоды:
Тадэвуш Кандрусевіч
«Дагэтуль ў нас быў цэнтар падрыхтоўкі катэхізатараў. Каледж мае шырэйшыя мэты перад сабою: катэхізацыйнай працай дзейнасьць касьцёла не абмяжоўваецца. Мы таксама ведаем, што ўсё большую ўвагу сьвет зьвяртае на мэдыі, яны маюць усё большую ролю ў жыцьці сучаснага грамадзтва, у тым ліку і касьцёла. Таму патрэбныя каталіцкія спэцыялісты, а таксама могуць атрымліваць адпаведныя веды і сьвецкія журналісты, якія працуюць у сьвецкіх СМІ. Таксама неабходна сацыяльнае навучаньне. Мы бачым колькі праблемаў у сьвеце, у кожным грамадзтве, у тым ліку і ў нашым. Далей — сям’я, справы дабрачыннасьці і гэтак далей. Я спадзяюся, што тыя адмыслоўцы, якія выйдуць з нашага каледжу — яны найперш будуць дапамагаць пры касьцельных структурах, але таксама яны павінны быць у грамадзтве».
Тадэвуш Кандрусевіч спадзяецца, што дзяржаўная рэгістрацыя Менскага тэалягічнага каледжу паспрыяе адкрыцьцю ў Беларусі вышэйшай духоўнай навучальнай установы.
Your browser doesn’t support HTML5
«Молім Бога за вышэйшую навучальную ўстанову»
Дзяржаўная рэгістрацыя азначае, што каледж прызнаецца дзяржавай як навучальная ўстанова, сказаў сакратар каледжу, ксёндз Юры Санько:
«Пакуль заняткі будуць праходзіць на базе Чырвонага касьцёла. Але плянуем
выкладаньне і ўся дакумэнтацыя будзе весьціся на беларускай мове
пашырэньне, маем надзею, што будзем мець свой будынак. Ну і натуральна тое, што выкладаньне і ўся дакумэнтацыя будзе весьціся на беларускай мове. Бо мы жывем, навучаемся, духоўна ўзрастаем у Беларусі, таму іншага быць ня можа».
Выкладчыкамі новага каледжу пераважна зьяўляюцца каталіцкія сьветары, але таксама і сьвецкія асобы. На першы курс Менскага тэалягічнага каледжу сёлета прыняты 21 студэнт — людзі рознага ўзросту і заняткаў. Пра падзею яны кажуць гэтак:
«Мяне зваць Алена, маю сям’ю і дваіх дзяцей. Натуральна, што ўзрост — далёкі ад школьнага. А тут такая шыкоўная магчымасьць ня толькі атрымаць веды, але і дзяліцца імі зь іншымі людзьмі — радасьць, вялікая радасьць».
З нагоды новага навучальнага году ў Менскім тэалягічным каледжы таксама адбылася прэзэнтацыя друкаванага выданьня першай энцыклікі папы рымскага Францішка, якая атрымала назву «Сьвятло веры». Арцыбіскуп Тадэвуш Кандрусевіч прачытаў даклад аб зьмесьце энцыклікі, а таксама асабіста ўручыў яе беларускамоўныя друкаваныя асобнікі кожнаму першакурсьніку.
