Журналісты «Працоўнай славы» паскардзіліся на дзеяньні галоўнага рэдактара, якая адключыла ім інтэрнэт і забараніла карыстацца міжгародняй тэлефоннай сувязьзю.
Матыў такога кроку — жаданьне прымусіць супрацоўнікаў газэты больш часу аддаваць працы, скараціць плягіят.
Рэдактар валожынскай раённай газэты «Працоўная слава» Ірэна Пашкевіч у адказ на скаргі раздражнёна заявіла карэспандэнту Свабоды:
«Прыяжджайце да нас у рэдакцыю, я дам вам магчымасьць пакарыстацца інтэрнэтам, дам магчымасьць пазваніць з „васьмёркі“... А калі вам цікава, то напішыце, што некаторыя журналісты ў „Працоўнай славе“ — не журналісты, а ў асноўным настаўнікі, пісаць ім цяжка, і „дзяруць“, скажам так, з „Советской Белорусcии“, зь „Мінскага кур’ера“ і нават з раёнак. Вось і ўсё. Я лічу, гэта плягіят. Я хачу, каб журналісты працавалі творча, з душой, каб нашую газэту любілі і зачытваліся ёю».
Рэдакцыя газэты «Працоўная слава» мае свой сайт, які досыць актыўна абнаўляецца.
