Паводле зьвестак аддзелу адукацыі, на сёньня гарадзкія ўлады ня выдаткавалі зь бюджэту гомельскім настаўнікам 1 мільярд 272 мільёны рублёў адпускных грошай. Ня выплачаны пэдагогам і травеньскі заробак, а гэта — яшчэ больш за 1 мільярд рублёў.
Настаўнікі засталіся і бяз чэрвеньскага авансу, які павінны былі выдаць ім яшчэ пяць дзён таму.
Вось што кажа пра свое безграшоўе настаўніца гарадзкой сярэдняй школы №60:
(Настаўніца: ) “Нічога сабе не купляем, толькі кефір і малако п’ем”.
Супрацоўніца фінансавай управы гарвыканкаму Вольга Малаева, адказная за разьлікі са школамі, сьцьвярджае, што на выплату настаўнікам заробку і адпускных у бюджэце няма грошай. Спадзяваньні — на банкаўскую пазыку:
(Малаева: ) “На наступным тыдні пазыку будзем браць. Са старой разьлічымся і будзем новую пазыку браць у банку і аддаваць. На наступным тыдні ўсё і вырашыцца”.
У асяродку фінансістаў сыстэмы адукацыі ходзяць чуткі, што шэраг прадпрыемстваў, іншых плацельшчыкаў толькі на паперы далі справаздачу на пералічэньне ў гарадзкі бюджэт 6,5 мільярдаў рублёў падаткаў. На самай справе грошы пайшлі на плітку для рэканструкцыі ходнікаў на вуліцах Камунараў, Савецкай ды іншых.
(Малаева: ) “Такіх зьвестак у мяне няма. У нас проста не паступаюць даходы, і нікуды налева яны не ідуць”, — сьцьвярджае супрацоўніца фінансавай управы Вольга Малаева.