ПАСАДЭНА (КАЛІФОРНІЯ) Амэрыканскі касьмічны карабель сёньня наблізіўся да Марсу, каб зрабіць спробу пасадзіць на гэтую плянэту дасьледчы зонд “Сьпірыт”, які мае шукаць на Марсе азнакі жыцьця. Касьмічны зонд памерам з дзіцячую каляску мае сесьці на Марс раніцай у нядзелю крыху на поўдзень ад экватару плянэты. Чарльз Элачы, кіраўнік лябараторыі Нацыянальнага касьмічнага агенцтва ЗША, папярэдзіў, што пасадка на Марс вельмі складаная. Паводле яго, раптоўны вецер ці камень з вострым краем можа пашкодзіць зонд і зруйнаваць місію. Сувязі з брытанскім зондам “Бігал-2”, які меўся сесьці на Марс 25 сьнежня, дагэтуль няма.
