Прадстаўнікі МВФ гавораць, што за апошнія некалькі гадоў Беларусь зрабіла некалькі крокаў наперад да асобных эканамічных рэформ. Але агульная макраэканамічная сытуацыя па-ранейшаму неспрыяльная. У 2002 годзе інфляцыя была найніжэйшая ад часу абвяшчэньня незалежнасьці – 27%, аднак найвышэйшая, калі параўнаць зь любой іншай дзяржавай былога СССР. Сярод пазытыўных зьмен была названая больш цьвёрдая, чым у папярэднія гады фіскальная і манэтарная палітыка. Зрухі адбыліся ў сфэры зьніжэньня датацый у энэргетыку, лібэралізацыі цэн, зьніжэньні ліцэнзійных перашкодаў, частковай прыватызацыі і стабілізацыі Фонду сацыяльнага забесьпячэньня. Аднак паралельна з гэтым ішлі вялізнае падвышэньні заробкаў ды іншых выплат, зьвязаных з павелічэньнем аж на 190% коштаў жытла і бытавых паслуг.
Справаздача МВФ гаворыць пра маруднасьць прыватызацыі і падаткавых рэформ. 80% усяе вытворчасьці ў Беларусі прыпадае на дзяржаўны сэктар. А так званы закон “залатой акцыі” дазваляе дзяржаве нацыяналізаваць любое ня цалкам прыватнае прадпрыемства, што, вядома, не спрыяе росту. Чакаецца, што сёлета інфляцыя ўзрасьце да 30%, а рост валавага нацыянальнага даходу зьнізіцца да 3,5%, хоць улады Беларусі малююць больш прывабную карцінку – рост даходаў і інвэстыцый ды зьніжэньне інфляцыі.
Сярод рэкамэндацый МВФ усё тыя ж: правесьці структурную рэарганізацыю эканомікі, прыватызацыю і лібэралізацыю. Спыніць дзяржаўныя датацыі, асабліва ў сельскую гаспадарку і капітальнае будаўніцтва, спыніць фінансаваньне Цэнтральным банкам дзяржаўнага дэфіцыту. МВФ таксама гаворыць пра зьніжэньне падаткаў і зьняцьцё юрыдычных і адміністрацыйных бар’ераў для прыватнага сэктару. Пазыкі МВФ будуць залежыць ад рашучасьці беларускіх уладаў праводзіць рэформы.
МВФ распрацаваў два сцэнары разьвіцьця сытуацыі: “нізкі” і “базавы”. Паводле “нізкага” сцэнару Беларусь можа атрымаць у пазыку да 140 мільёнаў толькі на агульна-грамадзкія праекты, як прафіляктыка сухотаў і СНІДу. “Базавы” сцэнар прадугледжвае да 270 мільёнаў на працягу 3 гадоў. Аднак пазыкі паводле “базавага” сцэнару будуць давацца толькі пасьля таго, як Беларусь прадэманструе паляпшэньне сытуацыі на працягу ўсяго году.
Асобны разьдзел справаздачы прысьвечаны эканамічнай інтэграцыі Беларусі і Расеі. МВФ не дае ніякіх ацэнак што да эканамічнай мэтазгоднасьці гэтага кроку, аднак адзначае, што Беларусь непадрыхтаваная да сапраўднай інтэграцыі эканомік.