Сёлета ў конкурсе “Роднае слова” ўзялі ўдзел больш за 700 вучняў з падляскіх школаў з дадатковым вывучэньнем беларускай мовы. Амаль сто зь іх трапілі ў фінал. Дадатковае вывучэньне беларускай мовы – гэта тры гадзіны на тыдзень. Аднак, гэтыя заняткі відавочна цікавыя, бо ў конкурсе вершаў выступіў ажно кожны пяты з 3,5 тысячаў вучняў, што вывучаюць беларускую мову на Падляшшы.
Паводле словаў Тамары Русачык, настаўніцы беларускай мовы зь Бельску-Падляскага і старшыні журы конкурсу, сёлета ўзровень выступоўцаў быў вельмі высокі. Гаворыць спадарыня Русачык:
(Русачык: ) “Нашыя дзеткі вельмі любяць дэклямаваць вершы беларускіх паэтаў. Вядома, што ў нашай польскай рэчаіснасьці дзеці польскамоўныя, таму часам ёсьць клопаты з вымаўленьнем. Але дзеткі вельмі стараюцца, і нашыя настаўнікі шмат робяць, каб паправіць фанэтыку”.
(Карэспандэнт: ) “А вершы якіх паэтаў часьцей за ўсё гучалі ў часе конкурсу?”
(Русачык: ) “Розныя, тыя, што мы маем магчымасьць тут атрымаць. Былі Васіль Вітка, Артур Вольскі, Кандрат Крапіва, Якуб Колас, Янка Купала, Уладзімер Караткевіч, Ларыса Геніюш, Натальля Арсенева, Алесь Золак. У гэтым годзе вельмі шмат было твораў эміграцыйнай беларускай паэзіі”.
Галоўнай мэтай конкурсу чытаньня вершаў “Роднае слова”, які ўжо 30 гадоў запар арганізуе Беларускае грамадзка-культурнае таварыства, ёсьць падтрыманьне беларускай самасьвядомасьці сярод беларусаў, што жывуць на Беласточчыне і асабліва сярод моладзі.