Сёньня

Міністар фінансаў Мікола Корбут на абвешчаную прэсавую канфэрэнцыю не прыйшоў, але накіраваў туды ўсіх сваіх намесьнікаў. На маё пытаньне “Колькі грошай пойдзе ў наступным годзе на прэзыдэнцкія выбары?” адказаў адзін з намесьнікаў міністра — Уладзімер Амарын:

“Рост, па-першае, абумоўлены тымі паказьнікамі, якія мы выкарыстоўвалі пад час фармаваньні бюджэту — гэта інфляцыя ў першую чаргу ды падаражэньне паслугаў, зьвязаных з сувязьзю ды іншых”, — паведаміў Уладзімер Амарын, намесьнік міністра фінансаў.

Прысутныя журналісты адразу зрабілі заўвагу: атрымліваецца, што інфляцыя на прадпрыемствах Міністэрства сувязі заплянаваная на узроўні 300 адсоткаў. Да таго ж, тэарэтычна выбары ў “Нацыянальны сход” мусяць быць значна даражэйшымі, бо выбіраюцца дзьве “палаты”, у ніжнюю балятавалася больш як паўтысячы чалавек, і бюлетэні ў кожнай акрузе былі розныя. На прэзыдэнцкіх жа выбарах кандыдатаў будзе значна менш, і бюлетэнь для галасаваньня будзе адзіны для ўсяе краіны…

Чаму ж замест 4 мільярдаў рублёў (гэта каля 4 мільёнаў даляраў сёлета), у наступным годзе на выбары пойдзе 12 мільярдаў рублёў, або з улікам падвышэньня курсу валюты прыкладна 10 мільёнаў даляраў? Няўжо паслугі сувязі падаражэюць утрая?

Вось як адказаў на гэтую заўвагу намесьнік міністра фінансаў Анатоль Сьверж:

“Па лініі Міністэрства сувязі — яны маюць свае тарыфы, якія зьмяняюцца, і мы пры фармаваньні бюджэту не разглядалі кожны артыкул — умоўна, менавіта Міністэрства сувязі. Мы мелі адзіныя падыходы пры фармаваньні бюджэту паводле выдаткаў ды імкнуліся прадугледзець тыя асаблівасьці, што зьяўляліся ў 2000 годзе, пры фармаваньні бюджэту на наступны год”, — сказаў намесьнік міністра фінансаў Анатоль Сьверж.

Яшчэ адзін намесьнік — Іван Шунько — распавёў пра стаўленьне афіцыйнага Менску да рашэньня зьменшыць падатак на даходы фізычных асобаў да стаўкі 13 адсоткаў.

(Шунько: ) “У нас па-ранейшаму 30 адсоткаў. Мы не рабілі зьменаў у законе пра падаходны падатак што да памеру ставак. Пакуль што мы ня робім зьменаў, аналягічных расейскім. З розных прычынаў — па-першае, і мы лічым, і спэцыялісты ў справах Расеі лічаць, што 13-адсоткавая стаўка — гэта не аптымальны варыянт, які можна цяпер прымаць. Па-другое, у Расеі зьмянілі стаўку падаходнага падатку ў бок зьмяншэньня й вельмі рэзка правялі скарачэньне колькасьці ільготаў.

Таму паўстае яшчэ сацыяльны чыньнік: а як жа быць з гэтымі пытаньнямі? У сувязі з гэтым ухваленае рашэньне пакуль што прапрацоўваць гэтае пытаньне, але так з-за пляча сячы па стаўцы ня варта”, — заявіў спадар Шунько, намесьнік міністра фінансаў.

Юры Сьвірко, Менск