Днямі ў Пінску быў распаўсюджаны зварот прэзыдыюмаў гарадзкога і раённага
саветаў дэпутатаў, у якім народныя абраньнікі заклікаюць людзей сабраць
грошы на набыцьцё новых машынаў хуткай дапамогі. Іначай, гаворыцца
ў звароце, ўзьнікае небясьпека таго, што хуткая дапамога ня зможа прыехаць
у патрэбны час да пацярпелых.
Чаму пінчукі, якім, як і ўсім беларусам, паводле канстытуцыі гарантаваная
бясплатная мэдычная дапамога, мусяць, акрамя падаткаў, аддаваць яшчэ грошы
на набыцьцё машынаў?
Каб палячыцца ў Пінскіх шпіталях ужо даўно трэба прыносіць с сабой амаль
усе неабходныя лекі, шпрыцы й бінты. І да гэтага жыхары гораду за апошнія
гады неяк прызвычаіліся. Але выпадкаў, калі па выкліку не прыязджала хуткая
дапамога, таму што там няма спраўнага аўтамабіля, у Пінску яшчэ не было.
Але калі браць пад увагу зьмест згаданага звароту гарадзкога ды раённага
саветаў, атрымліываецца, што гэта – цалкам рэальна.
Як нам паведамілі ў бухгалтэрыі гарадзкога а дзьдзь елу аховы
здароў’я, машыны мусяць набываць коштам гарадзкога бюджэту, аднак гэта
не рабілі ўжо некалькі гадоў. Супрацоўнікі бухгалтэрыі адзьдзелу аховы
здароў’я паведамілі наступнае:
(Супрацоўніца: ) “Дзеля таго, каб набыць новую машыну, у бюджэце зараз
вельмі цяжкае становішча, бо мы залежым ад падаткаў, якія пералічваюць
прадпрыемствы, а прадпрыемствы працуюць дрэнна, і таму значна менш паступае
падаткаў, і ўрэшце, у нас няма грошай”.
Паводле афіцыйных дадзеных, за дзевяць месяцаў бягучага году ў Пінску
прыбытковая частка бюджэту выкананая толькі на 62 адсоткі.
Варта зьвярнуць увагу на тое, што па грошы да жыхароў гораду зьвярнуўся
менавіта гарадзкі савет, а не прадстаўнікі выканкаму, які паводле заканадаўства,
пасьля зацьверджаньня мяйсцовым саветам павінен кантраляваць выдаткі ды
прыбыткі гарадзкога бюджэту. У гарадзкой станцыі хуткай і неадкладнай дапамогі
нам паведамілі, што каля 70 % машынаў ужо ад’ездзілі свой тэрмін, і іх
неабходна неадкладна мяняць.
І ўсё ж- ткі, ці можа здарыцца так, што аднойчы Пінск застанецца бяз
хуткай дапамогі?
Адказвае галоўны ўрач станцыі хуткай і неадкладнай мэдычнай дапамогі
Васіль Неўдах:
(Неўдах: ) “Не, такога ня можа быць, бо машыны мы маем у любым выпадку,
але сам парк вельмі стары. Таму мы хочам яго абнавіць".
Дарэчы, ўчора апоўдні адна з машынаў хуткай дапамогі згарэла. Афіцыйная
прычына пажару пакуль невядомая, аднак вядома, што гэта ня быў наўмысны
падпал.
Аляксей Дзікавіцкі, Пінск
