Сёньня ў Горадні адбыўся суд па адміністрацыйных справах, складзеных
на Пятра Анісімовіча і Міколу Ворана. 1-га лістапада яны былі затрыманы
каля помніка Янкі Купалы, пад час ушанаваньня памяці паэта. Абодва быццам
бы непадпарадкаваліся міліцыі. Суд цалкам апраўдаў першага з іх, а Міколу
Ворану быў прысуджаны штраф памерам адзін мінімальны заробак.
1-га лістапада каля шасьці гадзін вечара каля помніка Янкі Купалы перад
Гарадзенскім унівэрсітэтам міліцыяй былі зьнянацку схоплены 23 чалавекі,
якія стаялі з запаленымі сьвечкамі. Адна з жанчын чытала вершы паэта. Усе
былі дастаўлены ў Ленінскі РАУС. Але пратаколы аб непадпарадкаваньні і
нецэнзурнай лаянцы былі складзены толькі адносна двух затрыманых.
У судовай зале знаходзілася каля дзесяці міліцыянтаў--тых, хто ажыцьцяўляў
затрыманьне, і іхніх прыяцеляў. Паводзіліся яны упэўнена, сьмяяліся. Асабліва,
калі Мікола Воран запатрабаваў перакладчыка, адмовіўшыся размаўляць з суддзём
на расейскай мове. Перакладчык браў удзел у разборы, а таксама прадстаўнікі
Хэльсінскага камітэту Аляксандр Антанюк і Аляксандр Аношчанка.
Пад час суду высьветлілася, што міліцыянты першымі хапалі тых, у каго
заўважылі на грудзях бел-чырвона-белыя стужкі і эмблемы. Хаця людзі стаялі
спакойна, трымалі ў руках сьвечкі і слухалі вершы.
Выслухаўшы паказаньні сьведкаў з абодвух бакоў, суддзя Сяргей Ярашэвіч
не знайшоў у дзеяньнях Пятра Анісімовіча правапарушэньня і спыніў адміністратыўную
справу адносна яго.
Міліцыянты сцьвярджалі, што абодва затрыманыя нецэнзурна лаяліся. Сьведкі,
аднак, гаварылі, што тыя ніколі не карыстаюцца расейскай лаянкай. У першым
выпадку суддзя даў гэтаму веры, у другім, чамусьці--не. Ён прызнаў, што
сп-р Воран быццам бы сапраўды лаяўся. Але, маўляў, лаянка была выклікана
незаконнымі дзеяньнямі міліцыі адносна яго. Карацей, была апраўданай. Таму
ён карае яго штрафам памерам аднаго мінімальнага заробку.
Сяргей Астраўцоў, Горадня