З сёньняшняга дня ў Менску ды іншых гарадoх Беларусі ўдвая падаражэў
грамадзкі транспарт.
Рашэньне падвысіць кошт праезду ў грамадзкім транспарце Менскі гарадзкі
выканаўчы камітэт прыняў 13 траўня. Падаражэньне было ўзгодненае з урадавай
камісіяй у цэнаўтварэньні. Між тым, большая частка жыхароў сталіцы сёньня
зранку ня ведала пра такі крок уладаў. І таму мелі месца шматлікія непаразуменьні
й прэтэнзіі пасажыраў да транспартнікаў. У прыватнасьці, я назіраў, як
у сталічным мікрараёне Серабранка кандуктарка аднаго з аўтобусных паркаў,
якая гандлявала праязнымі талёнамі, вымушаная была тлумачыць літаральна
кожнаму пасажыру, што кошты ўзрасьлі ажно ў два разы:
(Кантралёр: ) “З сёньняшняга дня абвесьцілі, мы ж не вінаватыя ў гэтым,
прэзыдэнт наш… Зарплаты зьніжаюцца, жыві як хочаш”.
Двухразовае падвышэньне тарыфаў адбылося і ў менскай падземцы. Кантралёрка
мэтрапалітэну Ганна так патлумачыла мне сёньняшнюю рэакцыю пасажыраў:
(Ганна: ) “Усе яны ня ведалі, ехалі сюды на трамвайчыку ці на аўтобусе,
а сюды прыйшлі, кажуць – 40 тысяч”.
Як вынікае з тлумачэньня афіцыйных асобаў, сёньняшняе падаражэньне праезду
абумоўленае эканамічнымі й сацыяльнымі чыньнікамі. Заняпадам транспартных
гаспадарак і нізкімі заробкамі ў гэтай сфэры.
Старшыня Свабоднага прафэсійнага саюзу беларускіх транспартнікаў Уладзімер
Макарчук так пракамэнтаваў нашаму радыё гэтае рашэньне:
(Макарчук: ) “Урад, калі ўбачыць незадавальненне людзей, можа адрэагаваць
як звычайна: “Гэта вінаваты транспартнікі, гэта яны адпусьцілі кошты на
праезд, а мы тут не пры чым”. Між тым, транспарт сёньня, сапраўды, апынуўся
ў бядотным стане. Няма за што рамантаваць аўтобусы й тралейбусы, няма грошай
на паліва. Кіроўцы й рамонтнікі працуюць на энтузіязме, бо іхныя заробкі
мізэрныя на фоне ўсясьветных цэнаў на спажывецкія тавары.
З другога боку, падаражэньне праезду балюча б’е па дабрабыце іншых пластоў
грамадзтва. У дзіравым бюджэце няма сродкаў на грамадзкі транспарт. Гэта
сьведчыць пра памылковы эканамічны курс цяперашніх уладаў, пра тое, што
праводзіцца абсурдная эканамічная палітыка”, – сказаў лідэр Свабоднага
прафэсійнага саюзу беларускіх транспартнікаў Уладзімер Макарчук.
На ягоную думку, нэгатыўнае стаўленьне жыхароў да падаражэньня транспарту
абумоўленае перш за ўсё нізкімі заробкамі, пэнсіямі ды стыпэндыямі.
Міхал Стэльмак, Менск
