Галоўны прапагандысцкі рупар улады – дзяржаўная тэлевізія – апынулася
ў складаным фінансавым становішчы й вымушаная скарачаць ўласнае вяшчаньне.
Скарачэньне эфіру дзяржаўнае тэлевізіі – вымушаная мера. Раней аб’ём
уласнага вяшчаньня БТ складаў 8 гадзінаў, цяпер – толькі 6 гадзінаў. Пад
уласным вяшчаньнем маецца на ўвазе колькасьць праграмаў, якія створаныя
супрацоўнікамі тэлевізіі. Частка праграмаў узімку была закрытая, частка
– скарочаная.
Паводле словаў намесьніка старшыні тэлерадыёкампаніі Ўладзімера Купрыенкі,
уласнае вяшчаньне БТ можа скараціцца да чатырох з паловаю гадзінаў. Уласныя
праграмы будуць замененыя гатовай прадукцыяй. Хутчэй за ўсё, яна будзе
не самай высокай якасьці, бо грошай у дзяржаўнае тэлевізіі не хапае.
Тэлерадыёкампанія мае вялікую запазычанасьць перад тэлецэнтрам, на балянсе
якога знаходзіцца ня толькі тэлевізійная тэхніка, але й будынак, які займае
кампанія. На пачатку лютага запазычанасьць тэлецэнтру складала каля 26
мільярдаў недэнамінаваных рублёў. Дарэчы, паводле неафіцыйных зьвестак,
тэлецэнтар таксама мае значную запазычанасьць – каля 4 мільярдаў недэнамінаваных
рублёў.
У выніку дзяржаўная тэлевізія не заўсёды мае магчымасьць накіроўваць
сваіх супрацоўнікаў у заплянаваныя выправы, бо не хапае грошай нават на
бэнзын і выпраўныя выдаткі. Да таго ж, паводле словаў Купрыенкі, у тэлевізіі
няма магчымасьці аднаўляць тэхніку, у прыватнасьці – купляць запчасткі
да відэамагнітафонаў.
Заробкі ў супрацоўнікаў тэлевізіі невысокія – кіраўнік рэдакцыі атрымлівае
няшмат больш за 20 тысячаў рублёў, адказны сакратар – крыху больш за 16
тысячаў. Выключэньнем зьяўляюцца толькі супрацоўнікі АТН, якія атрымліваюць
значна больш – па некалькі дзясяткаў тысячаў. Але сума іхных кантрактаў
не абвяшчаецца.
Дарэчы, адная з прычынаў цяжкога становішча беларускае тэлевізіі – празьмерныя
выдаткаваньні на АТН, для якога, у прыватнасьці, было куплена шмат сучаснае
тэхнікі. Аднак скарачэньне эфіру тэлевізіі працы ідэялягічных праграмаў
АТН, хутчэй за ўсё, не закране.
Ганна Навумовіч, Менск
