У Гомелі працягваюць руйнаваць драўляныя дамы, якія вызначалі аблічча гораду на пачатку ХХ стагодзьдзя.
Даўшы дазвол на знос, гарадзкія ўлады самі так і ня вырашылі, што й як зь лепшых узораў драўлянага дойлідзтва захаваць для нашчадкаў.
Актывісты моладзевай гісторыка-краязнаўчай суполкі «Талака» 28 лістапада зьвярнуліся ў гарвыканкам, каб даведацца пра лёс сваіх прапановаў па захаваньні лепшых драўляных дамоў на вуліцы Валатаўской. Пісьмовыя прапановы яны дасылалі ў Міністэрства культуры, а копіі — непасрэдна ў гарвыканкам.
Прадстаўніца гарвыканкамаўскага аддзелу культуры, які абавязаны клапаціцца пра захаваньне гісторыка-культурнай спадчыны, паведаміла:
«Да нас дайшлі дакумэнты, і мы зараз будзем рыхтаваць адказ Міністэрству культуры».
Руйнаваньне дому № 23, архіўнае відэа
Your browser doesn’t support HTML5
Драўляны Гомель ідзе пад знос
Намесьніца кіраўніка краязнаўчай суполкі «Талака» Марыся Тульжанкова, якая хадзіла ў гарвыканкам, кажа, што аддзел культуры, па сутнасьці, толькі зараз пераняўся праблемай захаваньня гістарычных драўляных дамоў, хоць пра гэта даўно пісала незалежная прэса і нават мясцовая афіцыйная:
«Толькі сёньня атрымаў гарвыканкам ліст зь Міністэрства культуры з нашымі прапановамі — яго яшчэ не расьпісалі й нікуды не дасылалі. Аб’екты падлягаюць ахове, пакуль ня вырашыцца нешта — ці надаваць ім статус гісторыка-культурнай каштоўнасьці, ці не надаваць. Гэта будынкі на вуліцы Валатаўской №№ 15, 17, 19, 20, 22, 23 і 24».
Пакуль паперы блукаюць па кабінэтах, драўляныя дамы на вуліцы Валатаўской працягваюць руйнаваць. Ужо разбурылі дамы № 23, 25.
Брыгадзір падрадчыкаў, якія сёньня руйнавалі дамы на няцотным баку вуліцы Валатаўской, апавёў:
«Усё ідзе ад заказчыка. Фронт працы вызначаны праектна-каштарыснай дакумэнтацыяй: два драўляныя дамы 23 і 25 па Валатаўской. І сказалі — у бліжэйшы час яшчэ й крайні дом (ня памятаю ягонага нумару, падаецца, 21) будзе таксама зносіцца. Тэрміны ня вызначаныя, але хутка выканаем».
Дом № 17: у сьпіс ахоўнай спадчыны ці на дровы?
Зьнесены дом на Сожаўскай вуліцы
Забудоўцам вуліцы Валатаўской выступае менскае акцыянэрнае таварыства «Электрапрам». На месцы зруйнаваных драўляных дамоў плянуюць паставіць шматпавярховікі. Ад дома № 23, які меў разьблёныя аканіцы й фігурны ганак са шпілем, засталася кучка бярвеньня і будаўнічага друзу. Яшчэ раней пайшоў на злом двухпавярховы дом на рагу вуліц Сожаўскай і Карла Маркса. Падрадчыкі падбіраюцца да дома, дзе нейкі час жыла мэцэнатка княгіня Ірына Паскевіч, а пасьля месьцілася музычная вучэльня, у якой выкладалі вядомыя беларускія кампазытары, у прыватнасьці, Рыгор Пукст.
Мясцовыя краязнаўцы лічыць, што з драўляных дамоў, якія зараз няшчадна руйнуюцца, на той жа вуліцы Валатаўской альбо на Пляханава, у колішнім гістарычным раёне Спасава Слабада, можна было стварыць музэй драўлянага дойлідзтва пад адкрытым небам.
