Прыезд у Менск ў сярэдзіне 1980-х гадоў паўночнакарэйскага лідэра Кім Ір Сэна зьдзівіў двойчы. Першы раз – менчукоў і чэкістаў, другі раз – пераважна толькі чэкістаў.
Калі картэж з генэралісімусам паехаў па беларускай сталіцы, целаахоўнікі таварыша Кіма апусьцілі шкло ў лімузінах і выставілі аўтаматы. Трэба меркаваць, супрацоўнікі КДБ, якія адказвалі за ахову, аж спатнелі: да гэтага менчукоў ад непрадказальных гасьцей надзейна ахоўвала куленепрабівальнае шкло, а цяпер адзін нягеглы рух мог скончыцца трагедыяй – людзей жа вывелі на праспэкт махаць паўночнакарэйскімі сьцяжкамі. Дзякуй Богу, ва ўрадавую рэзыдэнцыю ў Заслаўі даехалі без прыгодаў.
А пра тое, што было ў Заслаўі, распавядаў адзін з былых сакратароў ЦК КПБ. Да прыезду Кім Ір Сэна карэйскі бок папрасіў паставіць у рэзыдэнцыі ложак нестандартна вялікіх памераў – яго адмыслова і зрабілі да візыту госьця. Заінтрыгаваныя гаспадары ўсталявалі ў спальні камэры назіраньня (а магчыма – яны там і былі ўвесь час; не зьдзіўлюся, калі і цяпер засталіся).
Тое, што ўбачылі чэкісцкія вочы, калі таварыш Кім адышоў да сну, зьдзівіла іх значна болей, чым прагляд канфіскаваных у няўстойлівых элемэнтаў забароненых у СССР порнафільмаў.
Да генэралісімуса ў спальню прыйшлі пяцёра ці шасьцёра дзяўчат. Не – нічога такога, што супярэчыла б сьветламу вобразу вялікага тэарэтыка ідэяў Чучхэ, не адбылося. Дзяўчаты проста леглі на ложак і прыціснуліся да цела таварыша Кіма. І таварыш Кім імгненна заснуў. Напэўна, так таварышу Кіму было цяплей.
Ну, а цяпер – пра ўнука таварыша Кіма.
Сёньня International Herald Tribune напісала пра зьяўленьне на цырымоніі адкрыцьця забаўляльнага парку новага паўночнакарэйскага лідэра Кім Чэн Ына разам з маладой, стыльна апранутай жанчынай, якую мясцовыя СМІ назвалі «таварышам Ры-Соль-Ю, жонкай маршала Кім Чэн Ына».
Your browser doesn’t support HTML5
Жонка Кім Чэн Ына паказалася на публіцы
International Herald Tribune вызначае гэтую падзею як «сыгнал да адкрытасьці» і, больш за тое – «разрыву зь мінулым» і заўважае, што з моманту свайго прыходу да ўлады новы паўночнакарэйскі лідэр паводзіць сябе больш раскавана, чым паводзіў сябе ягоны суворы бацька.
У якой цывілізаванай краіне такая падзея прайшла б незаўважанай – уласна, з жонкай лідэра грамадзтва пазнаёмілася б яшчэ ў часе выбараў, бо сямейнае жыцьцё палітыка, увогуле публічнай асобы ў грамадзтве з дэмакратычнымі традыцыямі заўсёды пад увагай. Але ў дадзеным выпадку гаворка пра самую, магчыма, замкнёную краіну ў сьвеце. Якая, пры гэтым, валодае ядзерным арсэналам.
«Можна ўпэўнена выказаць здагадку, што ў такой жорстка кантраляванай дзяржаве ніводнае такое адкрыцьцё не адбываецца выпадкова», – піша International Herald Tribune і цытуе меркаваньне паўднёвакарэйскага экспэрта Чон Сон Чана: «Зьяўленьне Кім Чэн Ына на публіцы з жонкай спадабаецца маладым паўночнакарэйцам, якія імкнуцца да пераменаў, асабліва жанчынам, якія жывуць у грамадзтве, дзе моцна дамінуюць мужчыны».
Пры гэтым варта нагадаць, што жыхары Паўночнай Карэі ня мелі ніякай інфармацыі пра сямейнае жыцьцё свайго ранейшага лідэра – Кім Чэн Іра. Ніводная зь ягоных трох жонак ніколі не была прадстаўленая ў ролі першай лэдзі. Больш за тое: нават пра цяперашняга кіраўніка краіны, Кім Чэн Ына, паўночнакарэйцы даведаліся толькі ў 2010 годзе, калі ён быў прадстаўлены ў ролі пераемніка бацькі.
Такая практыка нагадвае часы СССР – сямейнае жыцьцё савецкіх лідэраў (Сталіна, Брэжнева, Андропава, Чарненкі, выключэньнем, у пэўным сэнсе, быў Хрушчоў) заставалася для савецкіх людзей таямніцай.
Напрыклад, за васямнаццаць брэжнеўскіх гадоў усё, што мы ведалі пра жонку генэральнага сакратара – гэта тое, што на выбары яна прыходзіць у каракулевым футры. А цікаўнасьць да абставінаў загадкавай сьмерці Надзеі Алілуевай сканчалася ў часы Іосіфа Вісарыёнавіча, у лепшым выпадку, ГУЛАГам.
Традыцыю зламаў Гарбачоў, які прадставіў сваю Раісу Максімаўну спачатку на Захадзе, а потым і ў сваёй краіне. І – калі меркаваць з мэмуараў тагачасных заходніх лідэраў – менавіта гэта і было для іх адным са знакаў магчымых пераменаў.
А вось пра Галіну Радзівонаўну беларусы – за 18 гадоў Лукашэнкі ва ўладзе – ведаюць не нашмат болей, чым пра жонку Брэжнева. Так што таварыш Кім Чэн Ын у пляне адкрытасьці апярэджвае таварыша Аляксандра.
І ў выпадку візыту ў Менск яму не спатрэбіцца везьці з сабой жаночы эскадрон. Хіба што толькі пажадае сымэтрычна адпавядаць менскаму кіраўніку...
