5 ліпеня адбылася прэзэнтацыя новай кнігі сэрыі "Бібліятэка Свабоды" "Майстроўня. Гісторыя аднаго цуду" Сяргея Дубаўца. Сустрэча майстроўцаў і іх сяброў прайшла ў кнігарні «логвінаЎ».
«У чацьвер у Менску было вельмі горача, і аўтар кнігі і вядучы прэзэнтацыі Сяргей Дубавец хваляваўся, што прыйдзе мала людзей. Але прыйшло так шмат народу, што дзьве траціны стаялі на двары і слухалі прэзэнтацыю праз расчыненыя вокны.
Your browser doesn’t support HTML5
Гісторыя аднаго цуду ў Менску
Адкрыў імпрэзу Алесь Аркуш. Ён паабяцаў шмат неспадзяванак і ўручыў Сяргею Дубаўцу „Глінянага Вялеса“ за кнігу, якая выйшла яшчэ ў 2006 годзе — „Вострую Браму“, бо раней не было магчымасьці.
А Дубавец пажартаваў, што найлепшай формай імпрэзы было б маўчаньне. Але дзеля таго, што там былі ня толькі майстроўцы, ён вымушаны быў казаць зьмястоўныя рэчы. І нечакана для ўсіх даў слова найстарэйшаму майстроўцу Пятру Садоўскаму.
Пятро Садоўскі адзначыў, што ён быў ужо тады на пятым дзясятку і шмат чаго ведаў, але менавіта гэтыя маладыя людзі прывялі старэйшае пакаленьне ў беларушчыну.
Пачалі ўзгадваць майстроўцы, як Садоўскі ствараў атмасфэру весялосьці і заўсёды сьпяваў „Куру-шчабятуру“.
Цікавую гісторыю расказаў Вінцук Вячорка. Яго прадставілі як лідэра, але ён аспрэчыў, што лідэра ніхто не выбіраў і таму ў Майстроўні быў такі асаблівы дух. Гісторыя была пра Сяргея Харэўскага, які прыйшоў у Майстроўню 15-гадовым школьнікам і пачаў там гаварыць такое, пра што старэйшыя гаварылі толькі ў глухім лесе.
Гарачыня была такая, што імпрэза не зацягнулася надоўга. Скончылася ўсё на ганку — усе разам прасьпявалі ўсе тыя песьні, якія сьпявалі ў 80-я.
***
6 ліпеня а 17.00 пройдзе дыскусія вакол новай кнігі на Арт-сядзібе (вул. Куйбышава, 22).
Уваход вольны. Вядоўца — аўтар кнігі Сяргей Дубавец.
Сустрэча майстроўцаў і іх сяброў у кнігарні «логвінаЎ»
Сустрэча майстроўцаў і іх сяброў у кнігарні «логвінаЎ»
