Госьць Свабоды – удзельнік акцыяў у падтрымку зьняволенага ў Віцебску Сяргея Каваленкі, грамадзянін Расеі, сябар партыі «Адзіная Расея» і актывіст кампаніі «Гавары праўду» Пётар Іваноў.
Бушлякоў: На мінулым тыдні вас аштрафавалі – фармальна за брыдкаслоўе, якое нібыта пачулі міліцыянты. Вы ж назвалі сапраўднай прычынаю перасьледу тое, што распаўсюджвалі ўлёткі ў падтрымку зьняволенага Сяргея Каваленкі. Якія матывы вашай салідарнасьці з Каваленкам – вы лічыце яго сваім паплечнікам ці проста паўсталі супраць несправядлівасьці?
Іваноў: Я лічу, што Сяргей Каваленка таксама належыць да той плеяды палітвязьняў, якія, на жаль і на сорам, ёсьць у Беларусі ў даволі вялікай колькасьці. Такіх як Статкевіч, Саньнікаў ды іншыя. Я і за іх улёткі наклейваў і гатовы адстойваць іх свабоду. Мне сорамна за тое, што ўлада настолькі недальнабачна паводзіцца са сваімі суграмадзянамі.
Сяргей Каваленка мне сымпатычны тым, што ён мае свае погляды. Ці сыходзяцца яны з маімі ці не – гэта ўжо другое пытаньне. Ён мае мужнасьць адстойваць свае погляды.
Бушлякоў: Нашая віцебская карэспандэнтка, перадаючы на мінулым тыдні пра суд над вамі, расказала, што вы адначасна сябар партыі «Адзіная Расея» і актывіст кампаніі «Гавары праўду». Ці няма тут ніякіх ідэалягічных супярэчнасьцяў?
Іваноў: Дадам да сказанага, што я ініцыятар больш шырокага і глыбокага, на маю думку, праекту «Сумленная ўлада». Яшчэ летась я распрацаваў статут міжнароднага грамадзкага аб'яднаньня «Сумленная ўлада». Цяпер справа за тым, каб гэтае аб'яднаньне стварыць. «Гавары праўду» – гэта не палітычная плятформа. Гэта хутчэй сацыяльная, грамадзянская плятформа. Гаварыць праўду ніколі ня сорамна. А вось «Сумленная ўлада» – гэта чыста палітычная плятформа. Зь іншага боку, я вельмі хваравіта стаўлюся да пытаньня распаду Расеі. Бо гэта будзе непазьбежная грамадзянская вайна.
Цалкам гутарку можна слухаць тут:
Your browser doesn’t support HTML5
Госьць Свабоды - Пётар Іваноў, 30 студзеня 2012 году
