Юрась Навіцкі (зьлева паперадзе) і Ўладзімер Юхо (зьлева ззаду) заходзяць у суд.
У судзе Ленінскага раёну Менску адбыўся разгляд адміністрацыйнай справы адносна сябра Кансэрватыўна-хрысьціянскай партыі БНФ Уладзімера Юхо і аднаго з актывістаў руху «За свабоду» Юрася Навіцкага. Абодвух затрымалі падчас акцыі з нагоды дня памяці продкаў «Дзяды» і зьвінавацілі ў дробным хуліганстве.
Уладзімера Юхо і Юрася Навіцкага даставілі ў суд з турмы на Акрэсьціна, дзе яны знаходзіліся ад нядзелі, калі і былі затрыманыя. Усе гэтыя дні ім не тлумачылі прычынаў затрыманьня, і толькі ў судзе яны даведаліся, што іх вінавацяць у брыдкаслоўі. Таксама ад нядзелі абодва заставаліся бяз рэчаў першай неабходнасьці, якія адміністрацыя турмы адмовіліся браць у сваякоў. Як прайшлі гэтыя дні, кажа актывіст руху «За свабоду» Юрась Навіцкі:
Your browser doesn’t support HTML5
Юрась Навіцкі ў судзе пра сваё затрыманьне
«Вельмі кепска. Я набраўся там вошай, каросты і прастудзіўся, бо там вельмі дрэнна грэюць. Першы дзень нават не кармілі, а другі дзень я паглядзеў — дык тую ежу нельга ўжываць паводле якасьці. Усе сьпяць на адных нарах, покатам, без аніякай санапрацоўкі. Я кажу — пасьля такога патрэбна ў душ. А цяпер атрымалася, што падчас супольнай малітвы, на месцы пахаваньня, я яшчэ і брыдкасловіў. Абсурд. Недапушчальна — мяне б людзі за такое гналі ў тры шыі з гэтых могілак».
Я набраўся там вошай, каросты і прастудзіўся, бо там вельмі дрэнна грэюць
Актывіста руху «За свабоду» Юрася Навіцкага затрымалі непадалёк ад мэмарыяльнага крыжа «Ахвярам бальшавіцкага тэрору», усталяванага на месцы расстрэлаў у менскім мікрараёне Лошыца. Гэта адбылося адразу ж пасьля заканчэньня мітынгу з нагоды «Дзядоў», якія ладзіла Кансэрватыўна-хрысьціянская партыя БНФ. Людзі ў чорным не прадстаўляліся і не называлі прычыны затрыманьня, але яно адбылося пасьля таго, як спадар Навіцкі спрабаваў сфатаграфаваць аднаго зь іх.
Актывіста КХП БНФ Уладзімера Юхо затрымалі празь некаторы час каля палаца культуры «Лошыцкі».
Юхо: «Невядомы чалавек у чорнай вопратцы стаяў за маёй сьпінай, здымаў выступоўцаў і ўвесь час бубнеў, нібыта падчас жывой канфэрэнцыі. Я зрабіў яму заўвагу, кшталту таго, што ці не для Лукашэнкі ён здымае і перадае наўпрост. У адказ я атрымаў удар камэрай па галаве, ад якога зоркі з вачэй пасыпаліся. Калі я быў ужо ў пастарунку, то бачыў, як там маёры міліцэйскія перад ім бегалі. Вось гэты чалавек і завёў на мяне справу».
Падчас судовага працэсу Ўладзімер Юхо хадайнічаў аб вядзеньні працэсу на беларускай мове, але судзьдзя Навіцкая хадайніцтва адхіліла. Просьбу аб прадстаўленьні адваката і выкліку сьведак судзьдзя задаволіла. Але, не зважаючы на іхнія аргумэнты і сьведчаньні, Уладзімер Юхо атрымаў 7 сутак адміністрацыйнага арышту. Актывістка Кансэрватыўна-хрысьціянскай партыі БНФ Ала Гуца, якая прыйшла падтрымаць свайго паплечніка, гэтак пракамэнтавала вынікі суду:
«Уладзімер — гэта сама дабрыня, гэта вельмі выхаваны, інтэлігентны чалавек. Яны там яго вінавацяць у нецэнзурнай лаянцы — ён і слоў такіх ня ведае. Усё гэта сфабрыкавана, і, я думаю, таму, што ўладам не спадабалася, як прайшлі Дзяды ў Курапатах. Там было ўсё добра арганізавана, было шмат моладзі. У гэткіх месцах, як Курапаты, Лошыца — адбываецца кансалідацыя нацыі. Гэтага баіцца рэжым і тыя, хто за ім стаіць».
Актывіста руху «За Свабоду» Юрася Навіцкага судзьдзя Міхаіл Хома пакараў дванаццацьцю суткамі адміністрацыйнага арышту.
