Працэс Кавалёва-Канавалава. Дзень дванаццаты

17:30 3 кастрычніка ў другой палове дня ў судзе над Канавалавым і Кавалёвым працягвалі зачытваць пратаколы апытаньня пацярпелых, якіх прызналі менш цяжкімі пацярпелымі. Такіх аказалася каля 60 чалавек. Людзі падрабязна апавядалі, што зь імі адбылося, як яны выбіраліся зь месца выбуху, як дапамагалі іншым. Расказвалі пра матэрыяльныя страты, ацэньвалі іх ад 100 тысяч да 1 мільёна рублёў. Дзьве дзяўчыны згубілі пярсьцёнкі, адна маладая дзяўчына паведаміла, што згубіла пакунак зь вясельнай атрыбутыкай. Усе пацярпелыя чулі спачатку «хлапок», а потым ужо бачылі выбух. Народ у паніцы выбіраўся ад месца выбуху.

Потым у апыталі тых, хто атрымаў лёгкія пашкоджаньні. Многія зь іх ужо дома заўважылі, што пашкодзілі палец ці ў іх недзе кроў.

У аўторак чакаецца працяг апытаньня пацярпелых.

13:40 У судзе зачытваюць пратаколы допытаў, а таксама пратаколы прызнаньня людзей пацярпелымі.

Прызнана, што 34 чалавекі атрымалі цяжкія пашкоджаньні, 17 — лёгкія.

Самыя вялікая матэрыяльная страта з заяўленых — 4 мільёны рублёў, самая малая — 100 тысячаў рублёў.

11:30 Зранку ў судзе дэманстравалі відэазапіс агляду пашкоджаных вагонаў мэтро. Найбольш пацярпеў другі вагон пад нумарам 1494.

На відэа чутно, што ў часе агляду вагонаў там звоніць мабільны тэлефон кагосьці з ахвяраў.

Суд адхіліў хадайніцтва аднаго з пацярпелых Саакяна. Сааякян хацеў на свае вочы пабачыць пашкоджаныя выбухам вагоны. Аднак суд палічыў, што гэта можа выклікаць нэгатыўныя эмоцыі пацярпелых.